Ua toe filifilia foi Samoa mo le lima lenei o taimi e le tauvaga o loo pueina e televise ua faaigoaina o le Survivor, ma o Ausetalia lea e sau ai le tauvaga lenei o le a pue atu i Samoa nei.
E to‘a 15,000 le numera o tagata i Ausetalia sa fai i ai le sailiga o nisi e to‘a 24 ia ua filifilia e agai mai i Samoa mo le tausinioga lenei lea ua nonofo ai i se nofoaga e lei faailoa mai mo ni vaiaso, ae taumafai e ola i ia nofoaga e aunoa ma ni fale a o ni nofoaga foi ua masani ai le toatele.
Faaalia e le pule o polokalame a le alāata sefulu poo le Channel Ten a Ausetalia lea e ana le tauvaga lenei, ua toe filifilia foi Samoa e le latou polokalame ona o le siosiomaga o Samoa ua mafai ona faatino ai lenei tausinioga.
Ua faafetaia e le alii Palemia o Samoa, le susuga Tuialepa Fatialofa Auelua Lupesoliai Sailele Malielegaoi le toe filifilia e lea polokalame o Samoa mo le latou puega ata ma le tauvaga ma na ia ta‘ua ua faamautu ai lava le toatele ua agai mai i Samoa ma ua iai le manaoga e faaaogā laufanua o Samoa ma lona matagofie i polokalame faapenei ua faalauiloa i luga o televise i fafo.
Ua tusa ma le masina atoa talu ona amata galulue i latou i Samoa nei lava ia ua maua galuega i le faatinoga o lenei polokalame ma o le faaiuga o le masina lenei e amata ai loa lea taaloga ma amata ai ona pue le Survivor mo le Channel Ten a Ausetalia.
O le po anapo na feiloai atu ai nisi o kamupani poo pisinisi i totonu o Samoa ma sui o lenei ata, i latou ua faapea ona faatautaia le galuega tele lenei, ma le faamatalaga e 17 vaiaso lea na faataatia lelei mo sauniuniga aemaise o le taaloga.
O lea foi na agai mai i Samoa nei le vaega o le taaloga lenei o le Survivor a Amerika i tausaga ua mavae.
O le tausaga lenei ua matauina o nofoaga e pei o Saanapu, o Manunu nisi o le tele o nofoaga ua fuafua e pue ai lenei taaloga mo le televise lea o le Channel Ten a Ausetalia, ma o le faaiuga o le tausaga lea ua ta‘ua e tatau ona amata faaali ai le tauvaga lenei ua faia i Samoa i totonu o Ausetalia.
