Toe fetuunai itula faigaluega o leoleo falepuipui

Faitotoa o le falepuipui i tafaigata
Faitotoa o le falepuipui i tafaigata

O le vaiaso lenei e faagata ai tusi talosaga a le atunuu e fia talosaga atu i avanoa e 20 mo alii ma tamaitai leoleo o le falepuipui i Tafaigata. O lea ua savali le lua o tausaga ua pulea lava ele falepuipui ana galuega faatino ua tuu ese ma galuega faaleoleo.

Talu mai le tausaga na tea nei ua matuā toatele leoleo ale falepuipui i Tafaigata ua faate‘a i moliaga o le lē lelei ole faatinoga o auaunaga. E iai lava nisi o mataupu ua faapea nei ona taatia foi le iloiloga i luma o le Faamasinoga ile faaseā a nisi o leoleo ua faatea, ona o le mea ua soloatoa le tutuli ale pulega fou ua iai nei ma aofia ai ma i latou e leai ni galuega sese na faatino.

O le tele o tuua‘iga ua faatea ai leoleo ona o lipoti a pagota ua tuua‘ia ai lo latou faaaogā sese o o latou tofiga e saili tupe ai e pei o le faaaogā o pagota e faia galuega faainisinia i faletaavale a nisi o leoleo ia.

O fesootaiga ma gaoiga o nisi o taavale o faletaavale totogi aso i totonu o Apia. Ua toe ta‘u uma pagota na o latou galulue faatasi gaioiga ia. Faaalia e nisi o le aufaigaluega ua avea la le fai lava ma tutuli o leoleo ua matuā laitiiti ai lava le numera o leoleo o totoe.

O lea na fai se isi suiga fou o leoleo ile faaiuga o le tausaga na tea nei peitai e lei taitai ona lava i latou ia e faatinoina tiute pe a fuafua ile toatele o pagota lea ua silia ile to‘a 300 oloo nofo taofia i Tafaigata lava ia.

O suiga la nei ua uumi ai lava itula faigaluega o Leoleo ma ua iai nisi ua soloatoa lava le galulue i Tafaigata ua na oni nai itula e agai ai e malolo i o latou aiga ae toe faaauau. Faaalia e se tasi o le ofisa o leole o o Tafaigata, o le minisita fou lea ua tofia ile toese, le afioga Tuialavea Alfred Hunt, na talosagaina le fia vaai ile faasologa o taimi faigaluega a leoleo o Tafaigata ina ua tofia o ia e vaaia Falepuipui i le amataga o le masina. Avatu le lisi, toeititi lava a ta’i 24 itula e galulue ai isi i faasologa nei o taimi poo rosters.

Na toe ato mai i fafo e le Minisita le Lisi ma le faatonuga toe fetuunai taimi faigaluega o leoleo ina ia alu ma le tulafono o tagata faigaluega a le malo.

E pei lava o galuega a leoleo ma leoleo o falepuipui i fafo, e leai ni ovataimi ae e maua ponesi poo aso malolo faaopoopo pe a umi taimi faigaluega ae i Samoa e umi se taimi faatoa maua alauni o leoleo o Tafaigata, pe ta‘itolu masina ma maua alauni nei, ae e tele ina soloatoa i aso e fitu galuega sili mamao ma le ta‘i valu itula e faigaluega ai.

O lea la ua toe vaalaau avanoa faigaluega e pei ona ta‘ua ma le faamoemoe e tau tuu itiitia ai taimi faigaluega ma ia lava leoleo e faasolo i le faatinoga o tiute i soo se taimi o le aso.