O le tausaga e 1938 na soifua ai le afioga Mamalu o le Malo o Samoa, le Afioga Tui Atua Tupua Tamasese Efi, sa soifua o ia i le maota Samoa tele lea e i Vaimoso, lea e ta‘ua o le Maota o Matai‘a. Mai i le vaitaimi lea ua tele faalavelave faalenatura ua tulai mai ae sa tumau lava le fale.
O le fausaga tuai lava o fale Samoa lea na fausia ai lenei maota ma e aunoa ma se fao o fausia ai ae ua faaaogā lava le ‘afa.
Mo masina e lua na fausia ai e le Agaiotupu ma le Falefa o le Aiga o Salemalama mai i le afioaga o Asau lenei maota, ma o fausaga tuai lava na toe faalelei ai lenei maota. O le vaiaso na tea nei na tatala aloaia ai lenei maota e le Afioga mamalu i le Ao o le Malo, le Afioga Tui Atua Tupua Tamasese Efi.
Na auai i ai malo faaaloalogia na valaauina e le Ao o le Malo aemaise le afioaga o Vaimoso…I le afio mai o le tama a le Fale ia Matai‘a, susū le Usoalii ma le matua ia Patau‘ave, alalatai tofa i igoa matua ia Tomaagaua‘une ma Agamalie, Manuleleua ma le Faleagafulu, matua ia To‘ala ma Tiufea ma le Malae ma upu ia Vaimoso.
Na saunoa le afioga mamalu i le Ao o le Malo i le agaga faafetai i lona aiga, Sa Matai‘a ona e lei logo atu i laua ma le masiofo i le faatinoga o lenei galuega e pei e foliga mai na fai lava e le Aiga latou ma e lei iai se manaoga e logo fua le Ao o le Malo i lea galuega ae ua fai lava e i latou.
Na ia ta‘ua, “pe lē vaaia lona tino i Vaimoso i aso uma, ae ia mautinoa o ia lava o le tama Vaimoso”. O le maota lea sa soifua ai ma o le nofoaga foi lenei e ta‘u lava o lona aiga.
Sa sami foi le maota fou i le tofa ai o le Ao o le Malo i lea maota i le faaiuga o le vaiaso ma faaaloaloga na paau i ai le aiga o Matai‘a i le faamalumalu a le afioaga o Vaimoso.
O se tasi lenei o maota Samoa e lē o aveesea lava vaaiga tuai o maota Samoa i lona fausaga, ma o se taumafaiga lenei ua faia ina ia mautinoa e tumau lea foi vaega tāua o tu ma aganuu faa-Samoa.
