O le faaleagaina ai o faleaoga o le Aoga Tulagalua a le afioaga o Vaiee i le afa o Eveni i le tausaga e 2012, ua sauni atu ai le Malo o Iapani mo lona toe fausiga.
O le Aso Lulu 28 Ianuari 2014, na faatautaia ai le sainigalima a le afioga i le Amapasa o le Malo o Iapani, Afioga Tuimaugaoalii Kazumasa Shibuta ma le Peresetene o le Komiti Faafoe a le Aoga Tulagalua a Vaiee, Afioga Lealaimuna Mapusaga Lealaimuna.
O lea fesoasoani e tauala mai lalo o Polokalame Fesoasoani mo Atinae a le Malo o Iapani. E $94,420 tala Amerika le aofai o le tupe o le a fuafua e toe fausia ai potuaoga mo alo ma fanau o le afioaga o Vaiee.
E valu (8) potuaoga, o le potu o faiaoga ma potu tusi, o vaega ia o le galuega lea o le a faatupeina i le tupe e pei ona sainia ai le feagaiga.
I le sainia ai o lea feagaiga na saunoa ai le Amapasa o Iapani e faapea, o se tasi lea o vaega o loo galulue faatasi ai le Malo o Samoa ma le Malo o Iapani, o le faamatuu mai lea o fesoasoani auā le atinaeina o soo se faalapotopotoga ma soo se atinae a Samoa e pei ona faailoa i le Tusi Taiala mo Atinae o Samoa (SDS), ma o le itu tau aoaoga o se tasi lea o vaega o lea atinae o loo ave foi i ai le faamuamua.
Na faaalia foi e le Amapasa e faapea, o le galulue faatasi ai o Iapani ma le Malo o Samoa, ina ia mafai ai ona iloilo poo ā vaega o atinae o loo moomia ai fesoasoani, ina ia faataunuu le manaoga o le atunuu i itu tau atinae o loo moomia ai le fesoasoani.
Na saunoa foi le afioga i le Amapasa, “talosia ia aogā lenei fesoasoani, ina ia siitia ai le tulaga aoaoina o alo ma fanau o Samoa i se siosiomaga lelei ma le matagofie.”
Auā o fanau o Samoa, o loo faalagolago i ai le lumanai manuia o le atunuu, o le faaopoopo lea a le afioga i le Amapasa.
Na momoli le agaga faafetai o le afioaga o Vaiee e tauala atu i le Peresetene o le Komiti a le Aoga Tulagalua, ona o lea ua tali mai le Malo o Iapani i le latou talosaga mo le toe faaleleia o le latou faleaoga.
“E lagona lo matou agaga faafetai i le Malo o Iapani aemaise o le Malo o Samoa, ona o le galulue faatasi ina ia maua e aoga a nuu ma afioaga fesoasoani e faatino ai atinae aemaise o le fausia o faleaoga e pei ona iai le matou faamoemoe.”
“O lea ua tali mai le Malo o Iapani, faafetai mo le manatu mai i alo ma matou fanau, ina ia maua faleaoga lelei e faatino ai a latou aoaoga.”
O le agaga faafetai foi o le afioga i le Peresitene i le Malo o Samoa, ona o auala ia na saunia e maua ai fesoasoani tau seleni e faatino ai atinae aemaise lava i le itu tau aoaoga.
“E pau le vaega lea o le a matou alo atu i ai, o le faatino loa o le galuega.”
E mo le silafia e le mamalu o le atunuu, e lē o se taimi muamua lea ua faatino ai sainigalima a le Malo o Iapani ma aoga i totonu o le atunuu.
E tele nisi o aoga na faatautaia foi sainigalima ma le Malo o Iapani, auā lava le tuuina atu o seleni e toe fausia pe toe faaleleia ai tulaga tau faleaoga i totonu o nuu ma afioaga.
O le tausaga e 1991 lea na amata galulue ai ma le Malo o Samoa ma le Malo o Iapani, ma o loo iai le faamoemoe o Malo e lua, ina ia faatumauina ai pea le galulue faapaaga lea, auā fesoasoani e tuuina mai mo atinae o le atunuu.
