Toe faaui i tua lona filifilia ae toe saili se Nofo ile suafa Malietoa

Faamausili Moli, ua talosaga e toe faaui i tua lona suafa ae toe filifili suli ise nofo ma le Susuga Papalii John Taimalelagi Afele ose tasi o suli o Malietoa Natuitasina
Faamausili Moli, ua talosaga e toe faaui i tua lona suafa ae toe filifili suli ise nofo ma le Susuga Papalii John Taimalelagi Afele ose tasi o suli o Malietoa Natuitasina

Ole faasalalauga ile nusipepa ole Savali na faailoa ai le maliega a suli e toatolu ole suafa Malietoa na faia ile maota o Poutoa i Sapapalii ma tasi ai le filifiliga e faaee papa ole Suafa Tupu ole Malietoa ile afioga Faamausili Moli ose sui o Malietoa Moli, ua manino nei ua iai talosaga ua faaulu ile faamasinoga o Fanua ma Suafa ua teena ai lea finagalo ole aiga potopoto i suli o Malietoa Natuitasina, Malietoa Moli, ma Malietoa Talavou.

Ole mafuaaga lea na valaau ai se soalaupulega ile va oi latou ua talosaga tetee ma isi suli ole suafa ma na faia lea soalaupule i Mulinuu ile masina o Oketopa ole tausaga nei 2017.

Na faaalia e se tasi o suli o Malietoa Natuitasina le susuga Papalii John Taimalelagi Afele, ole soalaupulega lea na lafo ai se finagalo o Faamausili Moli e toe faaui mai i tua le finagalo na taoto iai le feiloaiga a suli ile masina o Iuni, ae toe lafo ile aiga potopoto e toe faia se filifiliga.

“Ole soalaupulega a lo matou aiga e lei mafai ona taoto ai ise tulaga maopoopo le faasalalauga na faia, ma o lea ua toe lafo i suli taitasi e talanoa poo le ā so latou finagalo ile talosaga ua folasia a Faamausili Moli”. Na faaalia foi e Papalii John Taimalelagi Afele ole tuua ole malo ele susuga Malietoa Tanumafili II ile tausaga e 2007, na taoto mai ai i feiloaiga na faia a suli ole latou itu i suli o Natuitasina ua oo iai le faasologa ose tasi e avea ma Nofo e tausia le aiga.

Peitai o feiloaiga a suli taitasi na faia i lenei sefulu tausaga talu ona avanoa le nofoa o Tavita, na maua ai le autasiga e toe lafo le Nofo i suli o Malietoa Moli lea na tusi aao ai loa e faaee le suafa Malietoa ile afioga Faamausili Moli. Peitai ona o talosaga tetee ua faaulu e nisi o suli o Moli ma suli o Malietoa Talavou faasaga ile faasalalauga na faailoa ai le tasi, ua toe taatia mai ai nei le mataupu e ono toe faia le filifiliga a suli mo se isi e avea ma Nofo.

“Ole itu lena o lea e popo’e ai lo’u suli ona sa faapea ua masuiga mālie le gasegase a Malo o lenei aiga ae foliga mai e le ole laasaga lea ole a oo iai”. E iai lagona ua faaalia afai e toe foi le filifiliga ile aiga potopoto i suli e toatolu ole a umi se isi taimi e faatalatalanoa ai se finagalo o suli. Peitai ua ta’ua e ia lagona ole isi auala e ono tupu ole faaulu loa ose talosaga poo ni talosaga ile faamasinoga e tofi ai se Nofo.

Ole aso 5 o Tesema 2017 ole a valaau ai ile faamasinoga o Fanua ma Suafa talosaga ua tetee ile faasalalauga faasino ile filifilia o Faamausili Moli. Peitai a’o lei valaauina le faamasinoga ole aso 29 ole masina nei o Novema (Aso Lulu ole vaiaso fou) ole a feiloai ai suli uma ile faamasinoga mo le faaauauina ole soalaupulega, ma ole a faamautu ai se finagalo o suli e toatolu ile talosaga a Faamausili Moli ina ia toe faaui i tua lona suafa ae toe lafo ile filifiliga i totonu ole lotoifale ole aiga potopoto i suli o Natuitasina, Moli, ma Talavou.