Toe faatepa tupulaga i tu ma aga faa-Samoa

Ina ua folasia le finagalo o le susuga i le faafeagaiga, Silo‘a Lologa i se fonotaga a le autalavou i se taimi ua tusa nei o le lua tausaga talu ai, na talia gofie ma faamalieina lagona o sui uma o le mafutaga ona pe a manatu i le tāua ma le aogā o le finaglao ua folasia mai i lumamea.

Sa faapena loa ona faavae i ai manatu ma lagona o le autalavou lea na amataina i le tausaga 2010 i ni faaaliga faaevagalia ma le faatinoina o le tala i le maliu ma le toetu manumalo mai o Iesu i le faamanatuina o le Eseta.

Na maofa le aumaimoa auā na lagona eseese foi tagata ma le toatele o sui mai isi aulotu na mafai ona latou molimauina lenei faamoemoe matagofie a tupulaga talavou a le aulotu i Weymouth EFKS, auā o nisi tagata na matuā lē taofiofia le loimata maligi na faailoa ai lo latou lagonaina o le molimauina o le feau ma molimoli mai e ala i faatinoga a le autalavou.

O lenei la tausaga o le sini autū o le polokalame a le autalavou, o le toe tepa i Tu ma Aga Faa-Samoa. O le Aso Toonai la na faataunuuina ai lenei polokalame matagofie e vaega e lua na vaevaeina i ai le autalavou atoa ma faaigoaina o le Feagaiga Tuai ma le Feagaiga Fou.

Na ta‘ua e se sui o le autalavou o le polokalame o le tausaga na tea nei 2010, sa faatauvaga lona faatinoga peitai o lenei tausaga, na faailoa ane ai e le susuga i le faafeagaiga, e lē faatauvagaina ona o le manatu ia auga lava le faatinoga o le faamoemoe ina ia manino ma malamalama le fanau e uiga ma taimi e faaaogāina ai tu ma aga Faa-Samoa.
O le polokalame na faamamafaina ai le faatinoga e le fanau o le ‘ava e faafeiloai o ni malo poo se Malaga.

E ese le manaia o le vaai ma le maitau auā o alo lava ma fanau na soifua a‘e i Niu Sila nei sa latou faatinoa vaega uma o le ‘ava a o taputapuai ma maimoa le autalavou matutua.
Auā o lagona ma manatu ia a lē faatinoa lava e le fanau, e faigata foi ona latou malamalama ma taliaina le uiga o tu ma aga nei a le agaguu faasamoa.

Na mae‘a le faatinoga o le ‘ava o le feiloaiga ona tapena loa lea o vaega e lua mo faafiafiaga faasamoa e pei o le mauluulu, sāsā ma le pese. Oka foi se mataina auā o alo lava foi na soifua a‘e i Aotearoa nei sa fai ma taimipese faapena foi i le taualuga i tausala.

Na faaalia lagona o le mitamita ma le faagaeetia o le mamalu o le auvalaaulia ma tagatalotu o le Aulotu a Weymouth ona o nei avanoa lelei ua faatinoina ai e alo talavou tu nei ma aga e fai ma o latou mitamitaga latou te faatāuaina ai la latou aganuu e pei ona tau faapupula ma faailoa atu ia i latou.

Na vaaia le fiafia tele o le tupulaga i lenei faamoemoe manaia ma lelei auā sa telē se tāua ma ni a‘oa‘oga na mafai ona latou mauaina ae sili ai ona fesoasoani tele lea mo le malamalama o fanau i uiga ma taimi e faaaogāina ai le aganuu i lo latou siosiomaga.

O polokalame lava nei e faatupulaia ai le fiafia ma le fia auai i ai o fanau i totonu o faalapotopotoga ma aulotu pe a lelei ona faavaeina, faatinoina ma faataunuuina.
Ia amuia foi nei tupulaga o loo maua avanoa latou te faatinoina ai ma faamalamalama atili ai tu ma aga faasamoa i o latou olaga e fai pea ma faamanatu mo lo latou soifua tuputupu a‘e.

Momoli ai le faamalo i le tofa na a‘e i le susuga i le faafeagaiga ma le laulau atofi o le autalavou, ona o tupulaga lava o le faamoemoega o aiga, Ekalesia, nuu ma atunuu.