Oloo i Niu Sila nei sui ole tausaga faaiu i aoga maualuluga i Samoa ile 1981, ile latou faatasiga (reunion) lona lua, talu ona iu mai kolisi maualuluga. Ta’ua ele sooupu ole vasega 81, Nanai Laveitiga Tuiletufuga, “Ole toatele o matou na aooga i aoga tulagalua i Malifa ma Vaivase, ona ta’ape lea i aoga maualuluga; o nisi i Avele, Kolisi o Samoa, St Mary’s, St Joseph’s, Leulumoega Fou, Maluafou ma Logoipulotu i Savaii.
O isi na malaga ese mai atunuu i fafo mo aoaoga i lea vaitaimi, ma faauuina ile tausaga 1981”.
Ole tasi o faamoemoe a lenei faatasiga na faataunuuina ile tausaga 2016, na o latou faamamaluina ai faiaoga ua malolo (retired) mai le galuega faafaiaoga, ile latou faatasiga ile tausaga muamua, e tauala atu ise ‘aiga faapitoa, e manatua ai i latou e pei o Mrs Iokapeta Fualuga Petaia, Mr Faasau, Mrs Pulotu, Faapea Mr Bishop ma le toatele oi latou ua fai i lagi le folauga.
Ile faamoemoe ole 2016 na toe faafetaia ai ele taitai ole sauniga Vaaelua Patu, le tausaga e 81 i lo latou sao ile atunuu ma mea ua o latou ausia ile latou tautua, ose itu e lē lava upu e faafetaia ai, aemaise le tuufaatasia ose faamoemoe e manatua ai faiaoga ua malolo ma ua maliliu foi.
“Ose faamoemoe ua leva na tatau ona faatinoina i tausaga faaiu eseese na a’oa’oina e i latou ua malolo mai le galuega faafaiaoga,” na saunoa ai le taitai ole sauniga ia Vaaelua Patu.
Ole talimalo ai o Niu Sila i lenei tausaga ua mafai ona auai mai ai le to’a 40 ole tausaga faaiu 1981.
E tolu aso ole latou faamoemoe i lenei tausaga, ma oloo latou asia nisi o Iunivesite i totonu o Niu Sila faapea nofoaga eseese ma mafuta faatasi.
E iai le talitonu ole tausaga e 1981, o lenei mafutaga oloo fanau mai ai ni mea lelei e unaia le mafutaga ole vasega 1981 i luma, ae faapea foi le tautua o sui ole vasega faaiu 1981 ile atunuu, aiga ma ekalesia.
“E lē maualalo ile tausaga faaiu ole 1981 lenei faamoemoe, e pei ona malaga mai ai nisi mai Samoa, Ausetalia, faapea Amerika ma Niu Sila nei.
Ose itu tāua tele ona e faama’ai ele uamea le isi uamea,” saunoa ai Tuiletufuga.
Ole faatasiga ile tausaga 2016 na taualuga iai le Sisigafu’a ole tutoatasi a Samoa ale vasega faaiu ole 1981, peitai o lea ua amata le latou 2018 i Niu Sila, ma oloo iai le faamoemoe ia latou mafutaga ile lumanai e faamautu atu i lenei faatasiga i lenei tolu aso.
Ole tuputupu ole malosi o lenei vasega ia latou fonotaga ma faatasiga, na fanau mai ai se manatu lelei, ma o latou tuufaatasia ai le Samoa Events Incorporated (SEI). Ose pisinisi e faatautaia ni mea e tutupu i Samoa (events).
Ole tele o agavaa eseese oloo ia i latou na faaiu ile tausaga 1981, ole malosiaga lea oloo i tua ole Samoa Events Incorporated.
Ole tasi o ia agavaa na mafai ai ona manumalo le (SEI) ile tauofoga a kamupani e faatautaia le tauvaga ale Miss Samoa mo le tolu tausaga, 2016 – 2018.
Oloo iai pea itu oloo tatala iai le ola auauna ole vasega faaiu 81 ina ia mafai ona fanau mai ai se mea lelei.
Ile taimi nei o Laeimau Oketevi Tanuvasa oloo peresetene ile asosi. Ole sauniga e amata ai le faatasiga ale vasega 1981, na saunia lea ele ekalesia EFKS Pakuranga Niu Sila.
Ole Aso Gafua, 8 o Ianuari, na amata faagasolo ai a latou asiasiga ma maimoaga i nisi o nofoaga; ole Aso Lua, 9 o Ianuari ole a agai ai ile Riverhead Cruise, Red Boats Westhaven.
Ole po ole Aso Lulu, 10 o Ianuari oloo faamoemoe ole a faia ai le ‘aiavā ma taualuga ai lenei faamoemoe.
Oloo faamautu uma le aumalaga mai Samoa ma le toatele ile City Walmart apartment . Ole toatele na malaga mai atunuu i fafo mo lenei faamoemoe ole a toe malaga ese atu ma Niu Sila ile Aso Tofi 11 o Ianuari.
