O le faletaavale a le Sai Motors i Apia

O le faletaavale a le Sai Motors i Apia

Talu ai nei na pasia ai e le kapeneta tausaga o taavale e aumai i totonu o le atunuu lea e 8 tausaga le matua e pei ona iai le taavale o le 2009 agai mai i luma le tausaga. O se faaiuga e lei talia gofie e le tele o fale faatau taavale i le atunuu aemaise foi o aiga sa mafai ona faameaalofa mai taavale mai Niu Sila ma Ausetalia, e oo foi iai latou na mafai lava ona okaina a latou taavale tuusao mai Iapani na le fiafia ona o le taugata ai o taavale mai le tausaga e 2009 i le tausaga na tea nei.

Peitai o le fonotaga a le Kapeneta i le vaiaso na tea nei na toe pasia ai le toe tuu i tua o le tausaga o taavale e aumai i totonu o le atunuu. Faamaonia mai e le Minisita o Tupe Maua a le Atunuu le Afioga ia Tialavea Fea Leniu Tionisio Hunt na tuuina atu le la pepa o le talosaga ma le Minisita o Galuega le Susuga Papaliitele Niko Lee Hang i le kapeneta ma talia aloaia ai le pasia lea o le toe faataga ona aumai ai o taavale ua 10 tausaga le matua e amata mai i le tausaga e 2008.

Saunoa Tialavea na mafua ona toe avatu lea talosaga i le kapeneta ona ua maitauina le tele o fale faatau taavale i le atunuu ua tau leai ni taavale ona ua fai si taugata tele o taavale e amata mai i le 2009 faatasi ai ma le toatele o le mamalu o le atunuu e autovaa atu i lona ofisa mo se fesoasoani.

Alii pule o le Sai Motors Vijay Jashani

Alii pule o le Sai Motors Vijay Jashani

Ta’ua foi e le Minisita e fai si tele o taavale a le mamalu o le Atunuu o loo taofia ai i luga o le uafu i Matautu talu mai le tausaga na tea nei ona e 2008 le tausaga ae na aumai sese mai i luga o vaa, ma o le toe faataga ai o taavale e 10 tausaga le matua ua mautinoa le faataga ai ona ave i tua o nei taavale mai luga o le Uafu.

Afai ae toe aumai se taavale o le 2007 mai Niu Sila ma soo se atunuu lava, o le a mafai ona toe faatietie i le vaa ma toe faafoi i le atunuu na aumai ai, saunoaga lea a Tialavea. O isi vaega o le talosaga lenei na pasia foi e le kapeneta, o le faataga ai lea o taavale itu agavale mai Amerika Samoa ona aumai i Samoa, ae na’o le ituaiga o pickup ma suv faatasi ai foi ma taavale a soo se tagatanuu o Samoa o galue ma faigaluega ai i atunuu e mamao e pei o Niu Sila ma isi atunuu o le a mafai foi ona aumai i Samoa nei pe afai ua faamoemoe e toe taliu mai i le atunuu e galue ai tusa pe tuai le tausaga o le taavale ae ao ona faamalieina ma faamaonia o le taavale na faaaogā i lana galuega i Niu Sila, ma i lalo o lea aiaiga e faamoemoe lea i le ioega mai i le Afioga i le Minisita o Tupe Maua.

O ia vaega uma na pasia ai e le Kapeneta i le vaiaso na tea nei, na matua lagolagoina ma le agaga fiafia e le alii pule o le fale faatau taavale i Samoa le susuga ia Vijay Jashani mai le kamupani a le Sai Motors Limited.

Ta’ua e Vijay talu mai ona pasia talu ai e le Malo le 8 tausaga o taavale e aumai i Samoa na tele lava le pau maualalo ai o le fuainumera o taavale taulia ona sa maua taavale i le $15 000.00 i le tausaga 2006, 2007 ma le 2008 peitai i le taavale o le 2009 i le tausaga na tea nei e maua i le $22 000.00 ae i le toe faataga ai e le Malo o le tausaga e 2008, o se faiga lelei tele lea mo le mamalu o le atunuu aemaise o nai o tatou aiga o faamoemoe i fanau i Niu Sila mo se seleni e faatau ai taavale i Samoa nei.

Na viia e Vijay le Afioga i le Minisita ia Tialavea e tusa ai ma le toe tuuina mai o le tausaga e 2008 e faataga ona aumai i le atunuu. Saunoa le alii pule o le Sai Motors e nate faafetaia le Malo ona o le mafai ona toe fetuutuuna’i  ana faiga faavae e fua i luga i le manaoga o le atunuu.

Talitonu Vijay o le a faafiafiaina le mamalu o le atunuu i Samoa eamaise foi o tagata Samoa i Niu Sila ona e mafai lava ona faatupe mai i Niu Sila se taavale mo Mom ma Dad i Samoa ae piki i le Sai Motors i Samoa.