Toe faaopoopo masina ole faaipoipoga a Polenisia ma Virgin Australia

Ua savali nei le 12 tausaga ole faaipoipoga ale Polenisia ma le kamupani vaalele ole Virgin Australia ile tuanai o tausaga sa pulea ai ele Malo le faagaioia ole kamupani vaalele ale atunuu. Ile masina o Iulai 2005 na faailoa ai le sainia ole maliega ile va ole Malo o Samoa ma le Virgin e faia se faaipoipoga e pei ona ta’ua ole faigapaaga poo le joint venture, e iai itu ua mautinoa ua lē lelei ai le mafutaga.

Ole taugata o pasese, ole tuai o malaga, ma le anoano o isi faaletonu ua faaseā ai tagata Malaga, ua silasila ai le Malo o Samoa e toe iloilo le faigapaaga. Ole tausaga ua mavae ile masina o Setema na faailoa ai ele afioga ile Palemia susuga Tuilaepa Lupesoliai Sailele Malielegaoi, le iai ole manaoga e tatau ona toe iloilo, ma sa tau ataata mai ai ile finagalo ole Palemia le toe silasila ole Malo e faagaioia lana lava kamupani vaalele ona ua iai itu ua faalēmanuia ole mafutaga.

Ua mae’a ona faia le feagaiga poo le memorandum of understanding ma le kamupani vaalele ole Tahitinui lea sa mafua ai ona malaga mai i Samoa le Peresetene ole Malo o Tahiti e faamautu lea feagaiga.

E oo mai ile taimi nei e lei tu laueleele lava i Samoa se malaga ale kamupani vaalele ole Tahitinui. O lea la ua faaalia ise faaiuga ale Kapeneta le toe faaopoopo ole lima masina ole faigapaaga ma le Virgin Australia a’o faaauau pea le iloiloina ole lotoifale ole faigapaaga.

O lona uiga ole masina lenei o Me na toe faaopoopo ai le taimi ole faigapaaga, ae muta ile masina o Oketopa ole tausaga nei lava 2017. Ole a tatou faatalitali ai pe ole a faaauau pea le ulugalii ale Polenisia ma le Virgin Australia.

Pe ole a liliu loa le Malo e toe faatu le Polenisia e pei ona sa iai muamua. Ole taimi atoa na faatupe ai ele Malo o Samoa lana lava kamupani vaalele sa sulu iai le atunuu ma maua le faamāmā avega.

Peitai sa faaletonu ai ma le kamupani vaalele ile tele o miliona o aitalafu ma faaletonu ai tupe maua ale Polenisia. E le toe fia manatua na tausaga ile tele o faitioga na fetaui ma le Malo ona ole Polenisia.

E iai nisi latou te lē lagolagoina le faatuina ele Malo ole kamupani vaalele ona o atugaluga tau tupe. Ole fesili ole ā se isi gaioiga e mafai ai ona maua ele atunuu se fesoasoani i malaga tau vaalele i isi atunuu aemaise ole va o Samoa ma Niu Sila, Ausetalia, ma Amerika.