O le tausaga e 1997 na amata ai faasalalauga a le fale faasalalau lenei e ta‘ua o le Laufou o le Talalelei, i lona tamai ofisa lava i le tau faasiusiuga o le Penisula i Mulinuu. O se ofisa faasalalau na faatū i lea vaitaimi e le susuga ia Pastor Viliamu Mafoe ma o se atinae na faatuina mo le Autalavou mo Keriso le Youth For Christ.
Alu a‘i alu a‘i, see ese Pastor Mafoe ona o le unaiga ma le faatūina o le Nofoaga tutotonu o Tapuaiga le Worship Centre ma faatūina ai lava le televise Kingdom TV faapea ai le leitio e ta‘ua o le Showers of Blessings poo Uaga o Faamanuiaga. O le Laufou o le Talalelei, o se ofisa faasalalau na toatele i latou na faafofoga i ai aemaise lava i le tupulaga a Keriso ma le fanau laiti i polokalame na faalauiloa ai ma faatalatalanoaga o le talalelei ma le tele o feau tāua na oo atu i tupulaga o le atunuu. Peitai o le leai o nisi e toe faatamoea lenei taumafaiga na vaaia ai loa le tapunia i le tausaga e 2010.
O le Aso Toonai la na tea nei na toe potopoto ai sui o le Autalavou a Keriso i lana komiti faafoe ma valaau i le mamalu o le atunuu o loo iai lava le manaoga e faaauau lenei auaunaga i Samoa mo se fesoasoani.
O lea fesoasoani na faaauala atu i se leitiofoni na fesoasoani le leitio poo le alaleo o le MAIFM 89.1 i lona faatautaiga, ma o le taeao atoa ma le aoauli o le Aso Toonai na faia ai lea faamoemoe ae faamautu uma atu i Mulinuu i luma ane lava o le fale faasaslalau a le Laufou o le Talalelei, le mamalu o le atunuu mo a latou foai na mafai ona faia i lea aso.
O le YFC lava lea ua iai le manatu e toe faaolaola lenei auala o tala‘iga o le talalelei ma ua iai foi nisi o le a agai ane e faatino galuega faasalalau ma polokalame auā le toe avatu o fanau ma le tupulaga talavou e faaali o latou manatu ma faasoa lo latou foi malamalama i le Tusi Paia i luga o lea alaleo.
O le faafetai a sui o le YFC o le iai pea o le ofisa ma mea faigaluega ma le faaauau ai o le lisi a le malo e ala i le Matagaluega o Punaoa Faalenatura ma le Siosiomaga, ua vaaia ai pea le tumau o le ofisa faasalalau.
E mae‘a ane le aoauli o le Aso Toonai e $30,000 (tala Samoa ua maua) ma nisi lava na agai atu ina ua tapunia le leitiofoni ma nisi fesoasoani faaopoopo.
Faaalia e le YFC e telē lava le manaoga o lenei ituaiga auaunaga aemaise lava o se auaunaga ua faasoa ai le finagalo o tupulaga talavou i luga o le ea e ala i polokalame o le a faagasolo ai, ma o le ola faatuatua ma le agai o fanau a le atunuu i le ola faaolaina o le faamoemoe laualuga lea o lenei leitio.
