E tusa ma le fitu masina sa tapenaina ma faagasolo ai le pueina (recording) o le lipine (CD) a le susuga ia Ted Stanley, o le alo o le afioga ia Su‘a Able Stanley mai le afioaga o Savalalo i Apia. O se alo foi e faasino i afioaga o Iva ma Saipipi i Savaii i le itu a lona tamā, faapea afioaga o Vaegā Satupaitea, Samauga ma Sinamoga i le itu a lona tina.
O le afioga ia Su‘a Able Stanley ua fai i lagi le folauga, e faapea o se tamalii sa lauiloa i si o tatou atunuu i Samoa i lana taleni pese a o soifua mai. O se tofa na a‘e i le susuga ia Ted Stanley a o se lagona foi na ia faalogoina ina ia ona faia se galuega e toe faaolaolaina ai pese na fatuina ma sa lauiloa ai si ona tuaa ua lē gata ina ua tuua talu ina motusia o le mafutaga, ae ua maitauina foi le toe fai mo nisi tagata pepese.
Na saunoa le susuga ia Ted, o le mafuaaga tonu lava o lona lagona e toe fuatai se taeao na afua mo si ona tuaa, ma fai foi lenei lipine ma pine faamau o alofaaga molipo pea mo si ona tamā.
Saunoa foi Ted o le afioga ia Su‘a Able Stanley, sa faafuasei lava ona motusia le latou mafutaga ina ua foi atu lana faigamalaga na agai mai ai i Aotearoa nei mo le pueina o lana lipine lea na faaigoaina o le “Ave Taavale” i le tausaga 1989, lea foi e iai ma le pese lauiloa “Beautiful Savaii” lea ua faaigoaina ai le CD fou ua ia saunia lea na tatalaina aloaia i le afiafi o le Aso Faraile i le maota o le Dream Centre i Manukau.
Sa faatumulia le faamoemoe tāua o le susuga ia Ted e le mamalu o le auvalaaulia o ana uo ma aumea mamae, o aiga uma i Aukilani nei ma nisi vaega o Aotearoa aemaise foi o fafo atu o Niu Sila e pei o Ausetalia, Amerika ma Samoa sa mafai ona auai ma molimauina le tatalaina aloaia o le CD Beautiful Savaii. O le sauniga lotu foi na faamua ai mea i Matautusa na taitaia e le susuga i le faafeagaia a le PIC Manukau, Susuga Rev. Karima Faia‘i, ma faagasolo ai loa le polokalame o le po.
Sa maualuga le faamoemoe o le susuga ia Ted auā sa auai atu ma lagolagoina malosi e le tamaitai faipule le Afioga Leaufaamulia Asenati Lole-Taylor; o lana afioga foi i le faipule sa saunoa aloaia ma ave le faafetai i le susuga ia Ted ona o lenei faamoemoe tāua ua na toe lalaga ai ni pese sa tusia ma lauiloa ai si ona tuaa, ma o le afioga foi i le tamaitai faipule na ia tatalaina aloaia lea mafutaga i lana sausaunoaga faasamoa.
Sa auai foi ma faailoa le lagolagosua a sponsors uma na togimaa mo le faamoemoe, aemaise ai le miliitino faatasi ma le mafutaga a le Pacific Collective i tamalii ma failauga, o faletua ma tausi aemaise o sa‘oao ma le malosi o le mafutaga auā le faatāuaina o lea po.
Sa faatofutofusia uma le auvalaaulia ma le CD i lea po. Matagofie faafiafiaga aemaise o sao o nisi o tamalii iloga i le taleni pese e pei o le susuga ia Willie Tavita, Tenari Tautua, Petelo Li‘a, Te‘o Latafale Lavea ma le susuga ia Lose Tominiko aemaise foi o le afioga ia Peseta Savea Al Harrington Lavea o ia foi lea sa na faafoeina le polokalame o le po.
O lea la ua mautinoa nei ua mae‘a le galuega ma ua avanoa foi le CD “Beautiful Savaii” a le susuga ia Ted Stanley mo le faatauina atu i lo tatou atunuu.
