Na tumutumu le malumalu o le Ekalesia Faapotopotoga Kerisiano Samoa i le Aso Sa na se‘i mavae au nei i le sauniga faapitoa na valaauina uma ai le afioaga o Fasitootai e failotu faatasi ai.
O le auga o lenei sauniga faapitoa ina ia faamautu ai le faaleleiga ua faatino ua toe tasi ai le pulega a alii ma faipule o le nuu lea na vaeluaina talu mai le tausaga ua tea. O mataupu eseese na laga i le vaeluaina o le nuu na oo lava i le taitai o le Malo atoa ai le Faamasinoga o Fanua ma Suafa.
O le Kerisimasi na mavae atu na talosaga ai nisi o matai o le afioaga mo le faamagaloga a le nuu ma le toe faaa‘e ai o se tasi o matai matua o le afioaga ua fitu lelei tausaga e lei toe talia i totonu o le nuu. O le mafaufauga o nisi o matai o lea ua mae‘a totogi le sala, ona o le tuua‘iga o le mulilua ma ua fitu tausaga o i tua o le nuu.
Na tulai mai se isi mataupu faapea ma na faasala le matai laitiiti na faia lea tulaga ae na toe faaa‘e e le nuu ae o le toeaina lea ua lē toe faaa‘ea lava. E talosaga atu nisi o matai ae lē talia e isi e aofia ai le matai laitiiti lea na toe faaa‘e. O le amataga lea o le feeseeseaiga ma o ese ai loa le toatele o nisi o matai ma fai lava le latou nuu. Na sosoo ma le mataupu o le toe faafouga o le faleaoga lea lava na iu ina aapa mai le Malo e faatulaga le vaega sa‘o o le nuu e tatau ona agai i ai le fesoasoani na faamatuu mai e le malo o Iapani.
E tele lava isi mataupu ma o le tulaga manino ua lē autasi finagalo o le afioaga ma ua atili ai le vaeluaina. O lea la ua mae‘a le faaleleiga a le afioaga ma ua toe a‘e uma lava matai ma ua unai le tutū faatasi a o le galuega tele lea na agiga i le sauniga lotu na saunoa uma ai lava taitai o le Talalelei ia Fasitootai i le agai i lua. O le faamatalaga a le tasi o sui o le afioaga le afioga Toleafoa Afamasaga Faamatala, o lea ua tasi le afioaga ma ua faamaualalo foi loto i le saili ai o se manumalo o le nuu atoa.
O le alofa e fusia uma ai tagata o le nuu na unai i lauga a faifeau e toaono o ekalesia lotu e ono a lea afioaga ma matai na fai ma sui o itu e lua na fevaevaeai e pei o Afamasaga Vitoria ma Toleafoa Afamasaga. O le lauga a le taitai, le susuga ia Rev. Eric Mulitalo na ave le faamamafa i le faitauga a le Tusi Paia ua faapea mai, “Amuia e e faatupuina le filemu, ua fai mo latou tofi le nuu.” O le taulai a le nuu i le taimi lenei o lana tupulaga talavou ma le faataitaiga lelei e tatau ona tuu atu i ai aemaise le vaavaai mai i taumafaiga mo atinae i totonu o le nuu. O le saunoaga a le tina na fai ma sui o le afioaga, o le faafetai sili lava o le maua o se laolao ua mafai ai ona toe foi le afioaga i le fealofani.
