Ua lē toe vaaia ile tele ekalesia EFKS sa faatino ai le BB poo le ‘Au a Tama le Boys Brigade ile gagana faaperetania, sa masani ona faatino ai galuega atiae mo tama talavou. Ole afioaga o Vaimoso ose tasi o nuu sa olaola ai lenei mafutaga ae na lē toe vaaia ini tausaga ua mavae, ae ose tasi o tamalii sa masani ona taulamua ai le tofa Mulitalo Siafausa sa lotolotoi ma taitai ile BB.
Ose mafutaga sa avea ai tama talavou ma sui sa latou faatino polokalame e fitoitonu lava ile autu ole ‘Au a Tama. A faamanatu le tutoatasi ole atunuu ose tasi lea o savali faaaloalo e masani ona vaaia, ae talu lava ona lē toe olaola lenei mafutaga ua lē toe vaaia. O lea la ole a toe vaaia se savali a ‘Au a Tama ise isi Sisigafu‘a auā ua toe faatuina le mafutaga ua faatautaia ele afioaga o Vaimoso.
Ua lua nei Aso Sa talu ona toe faatu le BB ina ua a‘e se finagalo o matai ole nuu e toe faaolaola e avea ose mafutaga e auai tupulaga talavou i latou oloo aooga, faigaluega male au lē faigaluega. Ole autu ia aveese ai le agai o tupulaga tama i isi faatasiga a tama talavou e aafia atu ai i solitulafono.
Ole tuanai ole masina na tea nei sa folasia ai i lipoti ma faasalalauga le aafia o nisi o tama talavou ole nuu i faiga kegi ma oo atu ai i nisi tulaga e maumau ai le olaga talavou, ole pogai lea ole toe faatu ole ‘Au a Tama poo le BB.
Faaalia ese tasi o matai ole nuu, ole fesili ale toatele poo fea o iai matai ae o lea e faatasina solo tama talavou ole nuu ini amioga lē taupulea, ma ole mafuaaga lea ole tasi ole finagalo e toe fafagu mai lenei mafutaga tāua.
Ole auai foi o tama talavou ole nuu ole a faaaogāina ai le tele oo latou taimi i galuega ma isi atinae ma alofia ai le oo atu i nisi gaioiga ma amioga e soli ai le tulafono. Ole a avea ai o latou tagata oni talavou e faia galuega fesoasoani mo nisi oloo manaomia le fesoasoani, ma faaaogā tatau le ola talavou i atinae e manuia ai o latou aiga, le nuu ma ekalesia oloo tapuai ai.
Ise lipoti a lenei nusipepa i sana lomiga e lei mamao tele atu oloo faaalia ai ese tasi o matai o Vaimoso le tofa Aulavemai Tafito, na oo atu le savali a leoleo ma talosagaina se fesoasoani ile vaoia o nisi o tupulaga talavou ole latou nuu ua maua i sailiiliga oloo aafia ise kegi sa faatupuina ni misa ile taulaga.
Mai lea savali na amata ai loa ona faia ele nuu ni galuega e faatino e ia tama talavou, ae o lea ua oo nei ina taunuu ise isi fuafuaga lelei ma tāua e pei ona toe faatino ai le mafutaga a tama talavou ole ‘Au a Tama.
