Toe faafouina olaga o tamaloloa fasi ava

O ai ea i matou ua outou manatu mai ai?

A mae‘a se galuega ona faapea lea o upu, ‘O i tatou o ni auauna lē aogā’, ae a uma se galuega ma ua iai se tāua mo nisi, ona tatou faapea lea, ‘O ai ea i matou ua outou manatu mai ai?’

E faaataata lafoga le lauga a le susuga i le faifeau penisione malolo manumalo le susuga Popo Su‘a ae o upu tuusa‘o na ia saunoa ai i le vasega muamua o alii ua faitoalua sa auai i le polokalame faufautua a le vaega o tamā o le Toomaga mo ē Puapuagatia ua ta‘ua o le Men Advocacy Group.

O le polokalame ua galulue faatasi ai le matagaluega o faamasinoga ma le faalapotopotoga o le Toomaga le Samoa Victim Support Group. Fai mai le susuga i le faifeau malolo manumalo o Popo Su‘a, i lana lauga faalaeiau i le faauuga lenei, “Sa ou manatu ina ua avatu le valaaulia ou te sau e fai le sauniga lotu, o ai se faifeau e fia faia se upu apoapoai i ni tagata amio leaga”.

Na soisoi nisi i ia upu o le lauga ae na ta‘ua e Popo o le feau lea mo i latou e 24 ua filifilia e faauu ona ua lelei lipoti mai i o latou aiga ina ua iai le suiga tele i le latou amio fasi ava ma le amio o le lima tete i nai fafine ma fanau.
Sa leai ni polokalame faapea i aso ua tuanai, auā a molia se tamā i le faamasinoga ona o le fasi ava, a aumai le faaiuga e alu i le falepuipui o le faaiuga lava lena. Peitai talu nei ona iai le faamasinoga e fofogaina ai mataupu faaleaiga poo le Family Court, o le toatele o tamaloloa e molia ona o le oo o le lima i o latou taitoalua ma fanau, ua ave i le polokalame a le Toomaga na amatalia i le tausaga nei.

O se polokalame ua faaalia e le pelesetene o le Toomaga le faletua o Lina Chang, ua iai se tāua ae ua faalautele foi i ai le galuega a le Toomaga mo ē Puapuagatia. O le Aso Faraile ua mavae na faia ai le faauuga, ma o le molimau a i latou na feagai ma le galuega faufautua, ua tele le suiga i olaga o i latou ua faauu.
O nisi sa fuafua e faauu ua toe ave i tua o latou suafa, ona ua toe maua lipoti mai i o latou aiga, ua toe iai ni faaletonu ua aafia ai. Faaalia e Lina e iai se isi o tina na auai i le faauuga, ona o le fiafia i le tulaga ua iai lona toalua peitai ua lē o toe mafuta le la ulugalii.

“Fai mai si fafine ua musu lava e toe mafuta ma lona toalua ona o le puipui lava ia te ia ina nei toe aliali mai nisi tulaga, ae ua sili ai loa ona aua ne‘i toe nonofo”, o le faamatalaga lea a le pelesetene o le Toomaga.

O se tasi o tamā ua lata i le onosefulu tausaga o le soifua na fai ma sui o le aufaauu e momoli le faafetai i le faamasinoga ma le Toomaga ona o le polokalame ua toe faafouina ai o latou tagata. O lana molimau ua aogā ua toe auli ai faletonu ae o le itu sili ona tāua, o le toe maua ai o le fiafia i le mafutaga faaleaiga i le va o le tamā ma le tina ma le fanau.
Le vasega faauu o tamā talavou sa solia le tulafono o le faaoolima i taitoalua poo a latou ava, ae ua aogā i ai le polokalame faufautua a le Toomaga mo ē Puapuagatia