Le susuga Damian McGrath na tuli ele Iuni Lakapi a Samoa ole a toe feiloai nei ma foliga o sui ole Iuni pe a faia le soalaupulega o lana tagi poo le Su faasaga ile Iuni Lakapi a Samoa ma le Ofisa Sili ole iuni

Le susuga Damian McGrath na tuli ele Iuni Lakapi a Samoa ole a toe feiloai nei ma foliga o sui ole Iuni pe a faia le soalaupulega o lana tagi poo le Su faasaga ile Iuni Lakapi a Samoa ma le Ofisa Sili ole iuni

Ua aumai se finagalo ole Faamasinoga maualuga ina ia ave le Su poo le tagi a Damian McGrath sa avea ma faiaoga Ulu ole aulakapi taitoafitu ale Manu Samoa e soalaupule ile va ma le Iuni Lakapi aoao ale atunuu pe atonu e maua ai se autasiga o itu uma ina ia lē taunuu ai le Su ise suesuega auiliili ale faamasinoga.

Ole tali lea ole valaauga ole mataupu na fofogaina ile vaiaso ua mavae ile faamasinoga maualuga ina ua talosaga le Ioia ale Iuni Lakapi e totogi muamua e Damian se aofaiga e $110 afe e avea ma tupe e tua iai le Iuni pe a alu alu finauga ae sau le faaiuga e manumalo le finau ale Iuni Lakapi aoao a Samoa.

Ole talosaga foi lea sa finauina ele loia ale Ofisa Sili ole Iuni e pei ona manao foi e  totogi e lē ua tagi le $90 afe e tua iai pe a te‘i ua faia‘ina le finau a Damian.

Ole mafuaaga foi lea na finau ai le loia ale Iuni le susuga Semi Leung Wai e lē manao le Iuni e ave le tagi ile soalaupulega poo le mediation ona e mautinoa e lē maua se autasiga ma toe iu ane ai le mataupu ile faamasinoga.

Sa finau atu le loia a Damian le tamaitai loia o Sarona Ponifasio e tatau ona ave le tagi ile soalaupulega ona ole tasi lea o aiaiga ole Konekarate a Damian ma le Iuni Lakapi ale atunuu. I finauga a loia na taunuu ile faaiuga ale afioga ile faamasino le afioga Vui Clarence Nelson ile apo ole finau ale loia ale itu tagi e ave le mataupu e soalaupule muamua ona ole tasi lea o aiaiga ole Konekarate.

Ole a iloa ai pe fusia faatasi itu uma ise maliega e mafai ai ona tau fai malilie itu ona lē taunuu lea ole faamasinoga. Peitai e manino e lē foi le itu tagi ile finauina ole Su auā ole autū lea ole tagi a Damian ole faamuta o lana konekarate ele Iuni ae e lei mae‘a le tolu tausaga.

O faamatalaga na tuuina atu ele Ofisa Sili ile autusitala e tusa ole faaiuga ale Iuni, ole pogai lea ole aafia ole afioga Faleomavaega Vincent Fepuleai ile Su e pei ona tuua‘ia ile taufaaleaga ile itu tagi.

Ole susuga Patrick Fepuleai ole loia lea oloo tauaviena le itu ale Ofisa Sili. Ole ave ole tagi ile soalaupulega ole a feiloai ai itu ole faamasinoga.

O lona uiga ole malaga mai i Samoa o Damian mo le soalaupulega, ole a toe faafesagai ai nei ma le Ofisa Sili ole Iuni ma ni sui ole Iuni Lakapi aoao a Samoa.