E tele faafitauli na tulai mai ina ua see malaga a le Lady Naomi i le uafu i Satitoa auā sa faaletonu ai tupe maua a le vaa la‘upasese aemaise o le faalapotopotoga o vaa a Samoa. Na toe aumai malaga i le uafu i Matautu Apia ona o ia faaletonu, ae o lea ua toe faasee atu i Satitoa ana malaga ona o tapenaga o le fono a atunuu tau atiae o le lalolagi ina ia faamalieina tulafono faavaomalo e tusa ai o lea taligamalo tele a le atunuu.
O le Aso Tofi o le vaiaso nei e amata ai ona malaga le Lady Naomi mai le uafu i Satitoa e tuua le uafu i le iva i le taeao, taunuu i Amerika Samo i le afiafi o le Aso Lulu i le teritori, ona tuua lea o Tutuila i le iva i le taeao o le Aso Tofi i Amerika Samoa taunuu i le uafu i Satitoa i le afiafi o le Aso Faraile i Samoa.
Ua faaleo mai ni lagona faanoanoa o nisi o le atunuu ina ua toe ave malaga i Satitoa ona o atugaluga i le mamao, aemaise o le a faigata foi mo le tulaga i le feoai mo le faatali o pasese ma uta, aemaise o le a iai ma nisi totogi faaopoopo mo le atunuu o loo faaaogāina le tautua a le Lady Naomi e lē gata mo malaga a o uta feaveai.
O lea ua faailoa e le faalapotopotoga o vaa a Samoa o le a iai se pasi e malaga ai pasese mo le Lady Naomi i Satitoa ae o le totogi o le pasese o le tagata e toatasi e $20.
O fanau e i luga atu o le 12 tausaga le matutua e $15 a o isi fanau e i lalo ifo e malaga fua. O uta uma mo le vaa e faaee i le uafu i Matautu i Apia ona ave ai lea i Satitoa, ae ua nao uta e manaomia le tuuaisa e faatoa faaee i le aso e malaga ai le vaa.
O atugaluga ia o i latou o loo ave uta pei o oloa tau faatoaga ona o le a tele le lavelave o feuiuiaiga. Peitai ua faailoa e le faalapotopotoga o vaa o le a leai se mea e popole ai le atunuu. E lē o faailoaina mai e le faalapotopotoga o vaa pe o le a toe foi mai i le uafu tele i Apia malaga a le Lady Naomi pe a mae‘a le fono a atunuu laiti tau atiae.
O le faaiuga o le masina nei o Aukuso e amata usuia ai le fono a atunuu laiti faasolo atu ai i le vaiaso muamua o le masina fou o Setema. O le a tuliloa le pulega o le faalapotopotoga o vaa i malaga a le Lady Naomi pe a mae‘a le fonotaga faavaomalo mo se isi faamatalaga.
O le faalapotopotoga o vaa a Samoa ua iai le pule o le uafu i Satitoa e aofia ai ma le vaega toso vaa o loo iai, faapea le pulea o le uafu i Mulifanua ma Salelologa. Ua na o le uafu i Matautu Apia ma Asau o loo iai pea i le pulega o Uafu le Samoa Ports Authority.
