E ui na manumalo le Olopeleki i lana taaloga ma Uelese i Ueligitone ae e pei lava na manumalo le tarako a Uelese ae faia‘ina le Olopeleki a Niu Sila.
Na taumate le toatele ole a malolo nei Uelese ini ‘ai se tele ile taaloga lona lua ole Steinlager Series a Niu Sila ma Uelese.
E mafua lea ona ole manumalo ale Olopeleki ile vaiaso na tea nei ile malae i Etena, sosoo ai male malolo matuia o Uelese ile Sifi a Waikato ile Aso Lua na tea nei. Ae lē gata i lea, e lei umi se tapenaga a Uelese mo Ueligitone, ae na malolo lelei le Olopeleki i aso e fitu ile va o taaloga faavaomalo muamua male lua.
Ile taaloga amata ole taamilosaga, e tolu taaloga faavaomalo a Niu Sila ma Uelese, na faia‘ina ai Uelese i ‘ai e 39 ile 21 a Uelese. Sosoo ai male malolo o Uelese ile Aso Lua ole vaiaso na tea nei.
E faigata tele le faia‘ina o Uelese ile ‘au ale Sifi a Waikato, 40-7 a‘o loma le taaloga i Ueligitone. Ile saunoaga a Warren Gatland ile faaiuga o lea taaloga na ia ta‘ua ai e matuā leai lava se tali a Uelese ile lelei ole lakapi i Niu Sila. Na ia ta‘ua foi le faigata o le tapenaina o le ‘au ile na ole fā aso toe feagai ma Niu Sila.
A‘o le Olopeleki foi, na folafola ele faiaoga Steve Hansen ole a faalelei mea na faaletonu ile taaloga muamua. E iai le puipui ole laina ale Olopeleki, sikalamu, laina i fafo, male vave ole sui ile va ole osofaiga male puipuiga. E lei lelei lea i Etena. Taunuu loa ile taaloga lona lua, na vaaia ai le alu malosi a Uelese ile ‘afa muamua. Na amata le taaloga, ae umi lava faatoa maua se ‘ai ole taaloga. Elē ole Olopeleki a‘o Uelese na mauaina muamua le sikoa ina ua faasala Niu Sila ile minute 13 ole taaloga. Ua fiu lava le Olopeleki e alu i luma ae na malosi ai le tetee a Uelese.
Na faatoa maua le sikoa muamua a Niu Sila ina ua osofaia ele ‘au le laina a Uelese ile minute sefulu male iva ole taaloga ma sikoa ai Israel Dagg le fulupeki. Sosoo ai male faasala o Uelese ma ova ai le aa a Aaron Cruden, Niu Sila 10-3 Uelese.
Ua taunuu foi ile minute faaiu ole taaloga ae sikoa loa ma Uelese i lana foueki a Alyn Wynn Jones. Manaia tele le pasipasiga ale laina i tua mai le isi itu ole malae ile isi itu lea na faatali atu ai Jones ma maua ai lana sikoa, taisefulu ai ‘ai ole taaloga, Niu Sila 10-10 Uelese.
Na foliga olea sola le Olopeleki male taaloga ile sosoo o ana sikoa e faa ile afa lona lua, o sikoa ia na maua e Ben Smith (minute 51 ole taaloga), Beauden Barrett (minute 54), Waisake Naholo (minute 59) ma Ardie Savea (minute 65). Ua oso ai i luga ‘ai ale Olopeleki, Niu Sila 36-10 Uelese.
Ole sikoa a Savea na matuā mataina. Na maua ile osofaiga a le Olopeleki mai lana 22m, ile tamoe a Naholo, pasi atu ia Dane Coles ma pasi atu ai ia Savea ile 40m. E leai se isi e toe mauaina Savea i lea taimi ile manaia o lana tamoe. Na faapea ua moe ai loa male tarako a Uelese, ae e leai. E lei pe le afi a le tarako.
E lei tapunia ele Olopeleki le va ole laina i tua ile toe osofaiga a Uelese, ma sao atu ai Liam Williams le uigi a Uelese ma sikoa ai ile minute 73 ole taaloga.
E lei uma lava le tarako, auā ole minute 77 ole taaloga na kiki ai e Seta Tamanivalu le polo, ae sapo e Uelese ile ‘afa ole malae ma tamomoe atu ai i le laina sikoa a le Olopeleki ma maua ai le sikoa a Jonathan Davies.
E lei ova le a‘a, sikoa ua iai, Niu Sila 36-22 Uelese. Na toe sikoa Niu Sila ile minute mulimuli ae peitai na ova i fafo le vae o Ryan Crotty ile tulimanu ole malae. Uma ai loa male taaloga, manumalo Niu Sila, ae toe manumalo foi ma Uelese.
E tele mea na manumalo ai Uelese, ole teritori (55 pasene), male u‘u ole polo (58 pasene), o laina i fafo (15-7) male puipui. E 138 pue a Niu Sila ile 74 a Uelese. O lona uiga e tele atu puipuiga a Niu Sila ona ole tele ole osofaiga a Uelese.
Ae le gata i lea ole molo male raka, na manumalo ai foi ma Uelese. Na ta‘ua ele faiaoga a Uelese, Warren Gatland, lona fiafia tele ile taaalo a lana ‘au. E foliga ile saunoaga a Gatland, e pei na manumalo Uelese.
Ile feiloaiga a le tusitala ma Ierome Kaino le Numera 6 ale Olopeleki na ia faailoa ai le matuā faigata tele ole foueki a Uelese. E ui ina manumalo Niu Sila, ae e lei faigofie ona o le fefeu o tagata lakapi a Uelese.
“E ui ina faigata le taaloga, ae na matou faalagolago lava matou ile tomai na ia ‘i matou uma lava ile faatiniina ole taaloga,” saunoaga a Ierome Kaino.
“Na tele foi mea na toe faaleleia mai le vaiaso na tea nei, peitai oloo tele foi mea e lei atoatoa. Pau le mea na mataina ole taalo lelei lea ole kapeteni ale matou ‘au, ia Kieran Read,” o saunoaga uma nei a Kaino.
“Ole a toe ausia se isi lelei ile Aso Toonai nei.” O lea saunoaga ale alii matua ole ‘au, e faaopoopo ile finagalo ole faiaoga ia Hansen, ile tapenaga mole taaloga faaiu ole taamilosaga a Uelese.
Oloo manao le Olopeleki elē na ole manumalo, ae ia manumalo ile matuā lelei tele ile la taaloga faaiu ma Uelese.
Niu Sila 36, Israel Dagg, Ben Smith, Waisake Naholo, Ardie Savea, Beauden Barrett tatao/sikoa.
Uelese 22, Alyn Wynn Jones, Liam Williams, Jonathan Davies tatao/sikoa.
