Toe afifi e le Malisi Samoa le Ipu o le Marist Samoa Sevens – 2015

O se tasi lenei o taamilosaga o loo tulimataia e le tele o Kalapu i tausaga taitasi ona o le agaigai pea i luma o ana tapenaga, faatasi ai ma le siitia o le tulaga o loo faafoeina ai i le maualuga ua iai nei le taaloga i nei onapo, le televave ma fesuiaiga o metotia eseese o loo faaopoopoina ma laina tutusa ai ma tulafono fou o loo faagasolo ai ia taaloga, e lē gata i atunuu lava ia e pei o Samoa, ae o le fai faalogologo i le Iuni Faatamā i taiala ma faasinomaga e ao ona mulimulitai ai mo le lelei agai i luma. I le faaiuga la o le vaiaso na se‘i mavae atu nei, ua leai lava se eseesega ma le tulaga o loo faalauiloaina ai taaloga i televise ma leitio faasalalau i atunuu i fafo e oo lava i nusipepa, se vaaiga matagofie ua oo i ai Samoa.

E lei iai se ofi o le nofoaga i Lotopa i tapuaiga a Au taitasi, o tagata malaga atu i fafo faapea foi Au malaga atu i fafo i lea faamoemoe, le lagolago a le Malo o Samoa o Pisinisi ma Kamupani i Samoa lava ua atili siitia ai le taamilosaga lenei a Malisi Samoa i tausaga taitasi.

O lea foi taamilosaga ua iloa ma silafiaina ai le tele o le lumanai o lenei taaloga i Samoa lava ia i alo ma fanau na ola ma soifua a‘e i Samoa lava. O tautalaga autu o lea faamoemoe o loo saga luitauina ai pea ma taulai i le Mafutaga a Malisi ina ia galulue ma le punouai e toe faafoi le Lakapi a Samoa i le maualuga e tatau ona iai. E ui i le vaapiapi o Lotopa ae sa lē solomuli ai Malisi e faataunuuina pea le taamilosaga, ona i le taimi nei o loo faagasolo le toe faaleleia o le Malae taalo Faavaomalo le Apia Park mo le taaloga faitaulia a le Manu Samoa ma le All Blacks ia Iulai i le tausaga nei.

Ma o se fiafiaga tele foi lea ia Malisi auā o le a siitia foi le malae i le Apia Park mo ana taamilosaga i lea foi tausaga pe a aulia atu i ai ma le manuia.

Toatele nisi iloga i lenei taaloga o le Lakapi i Samoa sa vaaia le auai, nisi na malaga atu i fafo ma isi o loo i Samoa lava faapea foi nisi mai le motu i Sasa‘e, ma e iai le talitonuga o le tusitala o lea ua oo i o tatou vaitaimi le tulaga, ua lē toe vaai maualalo i ‘au mai afioaga i tua ma Salafai i taamilosaga nei, auā ua molimauina le siitia maualuga o le atamamai o tupulaga fai a‘e lea ua iai i lenei vaitaimi.

Le ‘au Taitoafitu  a Malisi Samoa ua toe umia le siamupini