E toavalu i latou na malaga mai Ausetalia i le amata o lenei tausaga, e ofoina mai le latou tautua mo Samoa.
O i latou ua malaga mai i Samoa, o le a auauna i totonu o nisi o Matagaluega ma Faalapotopotoga a le Malo, aemaise o totonu o nisi o Faalapotopotoga Tumaoti e aunoa ma se totogi.
O le auga o le faamoemoe e pei ona auina mai ai e le Malo o Ausetalia o latou tagata e galulue i totonu o Samoa, ina ia mafai ona faasoa atu lo latou tomai i nisi o tagata faigaluega o falefaigaluega o le a tofia i ai.
O le galulue ai foi o i latou e pei ona malaga mai i Samoa, o le a faatumauina ai pea le galulue faapaaga o le Malo o Samoa ma le Malo o Ausetalia.
O le toavalu o i latou e aofia ai le alii o John Falconer lea o le a avea ma faufautua i le Vaega o le IT i le Faletupe Tutotonu o Samoa (Central Bank of Samoa).
O Timothy Sherry o le a galue i totonu o le Matagaluega o Pisinisi, Alamanuia ma Leipa e avea ma Faufautua o se tasi o vaega a le Matagaluega.
O Robert Allison, o le a galue i le Ofisa o le Samoa Institute of Director i le fesoasoani lea i le vaega o le Maketi (Marketing).
Andrew Jolly, o le a galue o se Faufautua i le Prosthetic Orthotic i le Vaega mo Auaunaga Lautele i le Falemai i Motootua.
Charles Parkinson, o le a galue i totonu o le Iunivesite Aoao o Samoa i le Papaigalagala i le vaega ua ta‘ua o le Applied Archaeology Trainer.
O le tamaitai o Sue Kitto o le a avea ma Sooupu i le Vaega e Puipuia Tamaitai i lalo o le Matagaluega o Tina ma Tamaitai, Atinae o
Nuu ma Afioaga ma Agafesootai.
Elise Snashall-Woodham o le a galue o se Sooupu mo le Faletupe Tutotonu o Samoa (Central Bank of Samoa).
Pavle Vizintin o le a galue i totonu o le Iunivesite o Samoa, o ia o se alii Faufautua i vaega tau suesuega.
O le galulue ai o i latou ia i falefaigaluega ua tofia i ai, o le a faasoa atu ai le latou tomai ma agavaa i le aufaigaluega o le a latou galulue faatasi.
E mo le silafia e oo mai i le taimi nei ua silia ma le 12,000 tagatānuu o le Malo o Ausetalia ua mafai ona malaga i atunuu o le Pasefika lea e aofia ai ma Samoa, e ofoina fua le latou tautua talu mai le tausaga e 1960.
Ae mo Samoa lava ia, ua silia ma le 400 i latou ua malaga mai e ofoina fua le latou auaunaga i totonu o Faalapotopotoga, Matagaluega ma Aoga e tofia i ai.
