“O le a e nofosala i le falepuipui mo le 5 tausaga ma le tolu masina”
E 11 masina o nofo taofia le alii o Vaiaoga Leatuvao ua 36 nei ona tausaga i le vaaiga a leoleo i Amerika, ina ua ia teena le faatonuga e toe tipoti mai i Samoa e tali i ona moliaga o le faamalosi teine, faaoolima matagā, ma le pule lē uma.
Ina ua mae‘a ona nofo taofia i lea atunuu ma aveesea faamalosi ma Amerika sa faasasa‘o i le falepuipui i Tafaigata ma nofo taofia ai mo le valu masina talu mai le masina o Iulai o le tausaga ua mavae.
O le valu o masina o nofo taofia o le Aso Faraile ua mavae na faatoa aumai ai le faaiuga a le faamasinoga i ona moliga e 14 o le pule lē uma ma le faaoolima matagā. E toatolu tamaitai e iai manaoga faapitoa sa aooga i se aoga mo i latou e logonoa na aafia i le solitulafono a lea alii.
O le matutua o tamaitai o le 15 ma le 18 tausaga. O tolaulauga a leoleo na faaalia ai sa avea le alii o Vaiaoga ma faatonu mo fanau e logonoa ma lē mafai ona gagana, i le faia o le gagana faitaga e fesootai ai nei fanau ma isi tagata i le taimi e agai ai i nisi o polokalame a le aoga.
O le tamaitai muamua na aafia e 15 tausaga le matua e faaiva ona faia i ai ni gaioiga solitulafono a lea alii. O le isi tamaitai e faatolu, a o le tamaitai mulimuli e faatasi ae maua loa lana gaioiga.
Fai mai leoleo o le taimi e momoli ai e Vaiaoga teineiti i le polokalame o le youth group, ma le toe momoliina i o latou aiga e faatino ai lana solitulafono. E mulimuli lava momoli tamaitai nei i o latou aiga i ni gaioiga sa eseese taimi na faia ai, ona ia faatino lea i ai o ni feusuaiga.
Ta‘ua e le tamaitai faamasino o Justice Aitken, na faaalia e tamaitai na aafia lo latou lagona lē fiafia ma le faanoanoa ona sa tilotilo ia Vaiaoga o se latou tamā, ma le lilo ia i latou ni uiga ailililo e faia ia i latou.
O le faanoanoa foi o tamaitai laiti ona e lei faatoese atu lava le alii poo lona aiga. O se faanoanoaga lea i le faamasinoga.
O le faia e Vaiaoga o le solitulafono o le pule lē uma, ma le faaoolima matagā na muamua faaui ai i tua e leoleo moliaga o le faiaiga fai faamalosi ina ua malie o ia e ioe i moliaga e 14 e soloia ma toe ave i tua ma le faamasinoga isi moliaga uma lea e faapea mai le faamasinoga e silia i le selau.
O alii o Vaiaoga Leatuvao, na faalia e leoleo na sola ese ma Samoa, peitai o le folasaga a lana loia na ta‘ua ai, sa mafua ona tuua e le taulealea Samoa a o loma lona faamasinoga, ona o se valaau mai lona tuafafine e alu atu i le gasegase o lo latou tina e nofomau i Amerika.
I le fua a le faamasinoga i sona faasalaga na amata ai ona faataatia le 7 tausaga ma le ono masina. Peitai ona o itu lelei e faasino ia te ia, e pei o le faatoa molia i se solitulafono, ma le ioe i moliaga, ua toesea ai le lua tausaga ma masina e lua.
Ua totoe ai le lima tausaga ma masina e tolu ua avea ma ona faasalaga i le falepuipui. Peitai o masina e valu sa nofo taofia ai o le a toesea. O lona uiga e totoe ai le fā tausaga ma masina e fitu o le a tuli i le falepuipui o lona faasalaga lea.
