O se alii 35 tausaga le matua lea na maua ua maliu i totonu o lana taavale sa tu e faafeasagai ma le fale kalapu o le Tausala Bar i Vaitele, o lea ua molia ai nei ni alii se toatolu. O le aso 16 o Novema o le tausaga ua mavae na tulai mai ai lea solitulafono, peitai sa faia sailiiliga ma suesuega a leoleo lea faatoa faailoa ai i latou ua molia i le aso 10 o Ianuari o le tausaga nei, i le faia o se gaioiga e fesootai ma le maliu o Uili Neil Seiuli.
O alii e toatolu ua molia sa inu faatasi ma lē ua maliu a o lei tupu le solitulafono. Saunoa le alii komesina lagolago o leoleo, Misa Tala‘imanu Keti, o se alii 19 tausaga le matua o Vaiusu-uta ma Saina, faapea se alii 23 tausaga le matua o Saina ma Faiaai i Savaii o loo tuua‘ia, faapea se alii 25 tausaga le matua Vaitele-tai ma Samauga.
O loo nofo taofia uma i latou i le taimi nei i le vaaiga a leoleo e faatali ai le valaauga muamua o o latou moliaga o le fasioti tagata faamoemoeina i le Faamasinoga Maualuga i le aso 10 o le masina fou o Fepuari.
E lē o matuā auiliili atili mai i saunoaga a le alii komesina lagolago le auala tonu na maliu ai Uili, ae na ta‘ua e mautinoa lava le mafua mai le ‘ava malosi.
E faafetaia ai foi e leoleo le lagolago mai a le mamalu o le atunuu i nisi o faamatalaga na tuuina mai ua mafai ai ona faafaigofie le galuega suesue a leoleo.
