Toatele na faafeiloaia le taunuu o le BlueSky i NZ

Ua leva ona valoia le taunuu mai o le kamupani malosi mo fesootaigai o le Blue Sky i totonu o Aoteroa, ae ua leva foi ona talitali le atunuu i le taimi o le a pa‘ū ai lea faamanuiaga ma le faamāmā avega mo tagata Samoa ma le Pasifika. O le Aso Gafua o le vaiaso ua mavae na lolofi atu ai le mamalu o le atunuu ma nisi o sui o le Pasifika i le faleaiga o le Manhattan e molimau le taunuu mai ma le tatala aloaia o le tautua a le kamupani malosi o le BlueSky.

O susuga i faafeagaiga ma o latou faletua, o sui o kamupani eseese, o aiga uo ma ē masani sa auai uma i lea faatasiga. Sa faapea foi ona auai mai ai ma nisi o le aufaigaluega a le BlueSky mai Samoa ma le auaunaga a le kamupani a le Spark o loo galulue vaavaalua nei ma lea kamupani. O le susuga i le faafeagaiga ia Rev Auvaa Eneliko mai le EFKS a Avondale na taitaia le polokalame i le sauniga puupuu, ona tulai lea o le tofa ia Lefau Fesolai Alamu e faafeiloai i le mamalu o le atunuu.

O le tofa ia Fata Ueligitone Malifa sa faatautaia le polokalame o le po, e tele ni vaega tāua na molimauina ai le tautua ma le auaunaga a le BlueSky i totonu o Aotearoa, e pei ona faamanino mai e le afioga i le alii pule sili o le Bluesky, Group CEO, Aoe‘e Adolfo Montenegro, o le sini autu ma le faamoemoe a le kamupani, “ia maua gofie ma taugofie fesootaiga o tatou tagata Pasifika” ma o le naunautaiga ia avea le BlueSky ma kamupani e faamuamua e tagata Pasifika i le lalolagi atoa.

Ae sa faamatalaina foi e le Pule Sili o le BlueSky i Niu Sila, Toleafoa Douglas Creevey, ua faamautuina mai i suesuega le fia lagolagosua o tagata Samoa i le kamupani BlueSky i Niu Sila, ma ua maitauina foi le toatele o le mamalu o le atunuu o loo faafesootai atu i o latou aiga ma uo i Samoa i masina taitasi, ma ua manaomia se auaunaga faigofie ma ia taugofie ai ona faafesootai atu i Samoa.

Na saunoa le Konesula o Samoa i Aukilani i le saunoaga autu o le po, Afioga Faolotoi Fatialofa Reupena Pogi e faafetaia ai le taunuu o le BlueSky i laufanua o Aotearoa. Sa maua foi le avanoa e valaau ai le afioga i le alii pule ia Toleafoa Douglas Creevey i Samoa, ma tali mai lenei uluai valaau e le Tamaitai Minisita Lagolago o Fesootaiga Faatekonolosi le tofa ia Faimalotoa Kika Stowers Ah Kau i sana saunoaga e faafetaia ai foi le mamalu o le atunuu o loo aumau i Aukilani i le lagolago i le tautua ma le auaunaga a le BlueSky.

Ma sa faafofoga uma le atunuu i lea po i luga o le telefoni a o saunoa le Minisita Lagolago i lona loto faafetai ma le fiafia i ona tagata i le faatasi atu i lea po. O le tele foi o faamanuiaga o lea afiafi sa maua fua ai le tele o SIM Card a tagata sa auai, ma nisi o telefoni ma jersey Manu Samoa sa faia ai le Se‘i.

Sa faafiafia ai i lea afiafi le ausiva a tamaitai o le La o Samoa, lea na faasolosolo lelei ai mafaufauga o le po ina ua tofu SIM Card uma tagata, aemaise le malosi o le taumafataga na saunia e le faleaiga a le Manhattan.

O upu mulimuli o le po na tulai ai Fata Ueligitone Malifa e fai ma sui o le BlueSky e momoli le agaga faafetai i le paia o le aufaigaluega totofi a le Atua ma o latou faletua, aemaise o le mamalu o le atunuu sa auai atu e molimauina le aso fiafia o le BlueSky, ma faaiu ai loa i le tatalo na saunia e le susuga i le toeaina ia Rev Tanielu Mamea.

Aoe’e Adolfo Montenegro (BlueSky Pacific Group CEO and President)