Toatele alo o Samoa maua faailoga faauuga Iunivesite USP 2013

E 97 alo ma fanau a le Pasefika ua faauu ma maua faailoga eseese i tomai sa aoaoina ai ae fulisia lava le au faauu o lenei tausaga 2013 i alii ma tamaitai mai Samoa.

Sa faauu ai foi ma nisi o fanau a le atunuu ua iu le taumafai i le lala o le Iunivesite a le Pasefika i Fiti e pei o i latou sa aoaoina i le tomai faafomai, loia, ma le auaunaga faafomai i le vaega o oloa poo nifo.
O le lipoti o lenei tausaga na folasia e le Pule aoao o le Iunivesite lea sa ta‘ua ai le tele o luitau o feagai pea ma le iunivesite i le faatinoga o ana galuega i le aoaoina o fanau a le Pasefika.

O nisi o ia luitau o le itu tau tupe peitai o loo agalelei pea nisi paaga o malo ma faalapotopotoga i fafo ma le sao o atunuu o loo iai o latou sea i le faatinoina o le iunivesite e pei ona 14 ona lala i le Pasefika.
O le au faauu o lenei tausaga i le faailoga o le Master i mataupu tau faatoaga e toatolu ua latou maua. O Dinesh Kodituwakku o le atunuu o Sri Lanka, Ilisoni Lsaga o Fiti, ma Runte Navian Likiafu o Tonga.

O le Master of Business Administration o alo uma o Samoa ua faamanuiaina ai, Donald Leumaga Chan, Silivia Filoialii Taupau Iona, Sesilia Lauano, Christopher Lei Sam, Andy Ripley, Iasoni Sititi, Taylor Toeaso, Siniva Ixoria Nuualofa Tuuau Enosa, ma Ruth Ueselani.

O le Postgraduate Diploma ua maua e Penieli Tokaduadua o Fiti, Viane Faifuaina o Samoa, Bimlesh Kumar o Fiti, Matio Lonalona o Tuvalu, Nafanua Jolaan Malele o Samoa, Ami Chand o Fiti ma Hauofa Felise Sisau o Tonga.
I le aoga faafomai, tausi soifua ma le auaunaga faalesoifua maloloina ua faamanuiaina ai le tamaitai o Loloma-Mai-Viti Esera o Samoa i le faailoga o le Degree and Bachelor of Dental Surgery. I le tomai faafomai i le Bachelor of Medicine and Bachelor of Surgery ua faamanuiaina ai foi ni alo o Samoa o Grace Gabriel, Maluapapa Afiafi Siaosi, ma Vaimaila Laurica Salele.

O le faailoga maualuga o se tamaititi aoga e maualuga le tomai i le mataupu o le Tulafono le Top Law Student ua maua ai e le tamaitai o Sheliza Leitioa Tapuai o Samoa, o le faailoga ua saunia e le Afioga Misa Telefoni.
O le faauuga mumua lea ua avea ai le Tupu o le Malo o Tonga o loo iai nei ma Faaao poo le Chancellor.
Le Faaao o le Iunivesite o le Pasefika, Lana Maiesetete le Tupu o Tonga Tupou VI, ma le Minisita o le Soifua Maloloina, Afioga Tuitama Dr Talalelei Tuitama, ma nisi o faauluuluga o le Iunivesite i le faauuga o le 2013 Le susuga Iasoni Sititi se tasi o alo o Samoa a o faamaonia e le Faaao o le Iunivesite le Tupu o Tonga, Tupou VI lona faailoga o le Master of Business Administration i le faauuga a le Iunivesite o le Pasefika i Alafua sa faia i le maota o Tupulaga EFKS i Sogi