E le faigofie le palota laitiiti a le itumalo o Gagaifomauga Numera tasi o loo tapena nei i ai, ona o le mau a nisi o le au faimafaufauga i upufai o Malo poo polokiki, sa faapea e toalua pe toatasi se sui tauva o le HRPP, ae o lea ua lē mafai ona tapuai nisi o sui tauva ae ua taufetuli uma lava i le sailiga o se tofi faipule e toatasi o le itumalo i le Palemene.
Faaalia e le taitai o le HRPP le afioga i le Palemia, susuga Tuilaepa L Sailele Malielegaoi, o le aiā tatau lea a le tagata e saoloto ai lana faaiuga i le fia tauva ma le tapuai ae lafo le faaaloalo i se toatasi. Peitai e leai lava se isi o le toafā o sui o le HRPP o fia tapuai na o le fia oso lava i luga o le fua auā o le mau masani taatele, e lelei lava le oo i ai ona iloa lea o le manaia ma le lē lelei o nei mea o faigapalota e saili ai tofi o itumalo i le Palemene.
O le Aso Faraile na tea nei na soalaupule ai e le komiti faapitoa a le HRPP ni ona sui, ae na taunuu e o uma loa le toafā e aofia ai le sui tamaitai e toatasi, o se tina o le atunuu ua lauiloa i le galuega faasalalau i le leitio o le 2AP i tausaga e tele ua mavae, le tofa Faimalotoa Kolotita Stowers.
O se tina sa tautua i le Malo i lana tautua faasalalau na iu ai lava ina tofia e avea ma Faauluuluga o le leitio ma le Matagaluega o Faasalalauga, a o iai lea matagaluega i tausaga ua tuanai.
O isi sui e toatolu e aofia ai ni tamalii se toalua mai Safotu lea foi e seei ai le faletua o Kolotita i le suafa Faimalotoa, o Ga‘ina Tino sa avea ma faipule o le itumalo lava lenei i ni paeaiga a le Palemene ua mavae sa avea foi ma minisita o le kapeneta, faapea le afioga Lavea Ieti.
O le sui tauva e toatasi o le Tautua Samoa le afioga Lavea Peseta Lua Nafoi o le afioaga o Safotu, ma o le isi lea itu mataina i le faiga filifiliga a le itumalo. O le sui tauva pito talavou o le palota laititi lenei e mai le afioaga o Manase, o le afioga Taito Vaea Tanu, o se alo e faasino i le afioga Taito Tanu Mu‘ese o loo umia ma pulea le faletalimalo lauiloa o le Tanu Beach Fales.
O le HRPP foi o le a tauva ai le afioga Taito Vaea Tanu o loo avea nei ma pule faatonu o le pisinisi a lo latou aiga. Ua faasalalau mai nei e le Komesina o faigapalota le susuga Papalii Malietau Malietoa, le avea o le aso 15 o le masina fou o Aukuso e avea ma aso e faia ai le palota laititi a Gagaifomauga Numera tasi.
Ua iai foi ma le faasalalauga faasino i le aso e faamuta ai le faauluina o suafa o sui tauva, aemaise o le piliota e toe faia ai le filifiliga a sui tauva i le faaauau pea ona faamauina lona suafa o se sui tauva, pe o le toe faaui mai i tua. O loo tatalo isi sui tauva ia oo atu i le aso lea ua toe tafa finagalo o nisi sui e tapuai ae lafo atu le taaloga mo latou.
