E tusa ole toluselau le aufaipese e aofia ai ma le aufaafiafia ale Afioga o Saleimoa i ona pitonuu uma lava, oloo afuafu tetele i a’oga pese ma faafiafiaga mo le fu’a a Amerika Samoa i le aso 16 o Aperila 2018.
“A faafiafia loa Saleimoa ua uma tala.” Ole talitonuga toatasi lava lea ole Susuga a Saolotoga Manutulila ose tamalii e lē iloa ma se mea tau faafiafia e oo lava ile siva luelue ole tino pe faataamilo, e misi atoa. Ina ua taunuu mai le valaaulia o Samoa, ae lafoia ai Saleimoa e tapenaina faafiafiaga ile pese ma siva, ma fia Falealili fua atu ai lava Saolotoga, ae lē ose Saleimoa.
Talu ai ole valaaulia faifai pea ile va o malo e lua i taimi o a la sisigafu’a, e faatalitali tini lava iai taitai o isi nuu, e talosia ae tofia mai latou.
Peitai na fesiligia se tasi o tamalii ole Afioga, ma ia faamaonia ai, “ole valaaulia na avane ile malo, ma tofia mai ai le matou nuu e malaga atu i Tutuila, e avatu le pese ma faafiafiaga.
“E lē gafatia e le matou nuu ona masii atu, ae ua iai le fesoasoani $20afe mai le malo, e tapena ai le malaga. E lē taumate e silia i le 300 le aumalaga, oi latou uma e aofia ai pitonuu uma e fitu ole afioaga, mai lava i Utualii e oo mai i Saleimoa.
Ua iai foi kamupani poo faleoloa ile nuu, ua avane a latou fesoasoani. O tapenaga o malaga faapenei e lē faigofie, auā e iai foi tu ma aga faa-Samoa e faatino. Faapei foi ona faia e le malo, i taimi o a tatou Sisigafu’a, pe a malaga mai Amerika Samoa ma isi malo faaaloalogia mai le Pasefika.
E tata’i a latou sua ma faaaogā ai Ie Samoa e sili atu ona mata lelei, e ‘au’au ai sua ma a latou tofa.
Ma o tulaga foi na e malaga atu ma Saleimoa pei ona talanoa le paaga, auā oloo iai le talitonuga e lē misi lava ma se usu faaaloalo ane ale afioaga o Pago Pago. Ua maua tala o Pago Pago oloo tu ai le maota o Tupulaga ale malo, ua fai ma api e tali tasi ai a latou malo faitele faapei ole aufaafiafia a Saleimoa. Ua afua ai ona faia saoga toga ma mea faapena mo le taimi o feofoofoaiga.
I faamaumauga o tali ga api o aumalaga atu i Samoa nei, e talivalaau i sisiga fu’a a Amerika Samoa i tausaga ua tuanai na maua ai lava le fesasia’i ma tuuaia ai aiga na api ai au faafiafia.
Ole avanoa ua ave e le malo ia Saleimoa e faafiafia ai ile sisigafu’a lona 118 lenei ale Teritori talu ona pulea mai e le malo tele o Meleke, e le gata ina ole a avea ose taimi muamua e faafiafia ai Saleimoa i sisigafu’a a Tutuila ma Manu’a, ae ose avanoa muamua foi mo le toatele ole a oo atu ai i le motu i Sasa’e.
Ole aupepese ma sisiva e aofia ai, tamalii, o alii ma faipule, ole malosi ole afioaga, o tamaitai, faletua ma tausi, ole vaega lea e lē o iai ni tuatuagia i galuega ma a’oga.
Na molimauina foi e le tusitala, o nisi o pese ua toe lalaga a’e nei i luga e le faafiafiaga lenei, o fatuga lava a tamalii ole nuu, na tusia ma fatu ile tusa ole 40 tausaga ua tuanai. Lea ua faa tauaina ai lo latou faamoemoe mo le tali valaau atu ile aso tele ole motu i Sasae.
I Amerika Samoa ile taimi nei, e ui ina oloo latou faaaogāina pea tu ma agaifanua a Samoa, peitai ole pulega ma le ta’ita’iga ole faafoega ole latou faigamalo, ei lalo uma lava ole Malo Feterale.
O tupe oloo faagaioi ai, pei ole totogiina o tagata faigaluega ale malo, o alamanuia o maua e ona tagatānuu, pei o Social Security penefiti ta’i masina, o tupe a tagata ua malolo litaea, o tupe o lafoga poo tax return faaletausaga, ole feoai o latou tamaiti aoga, i pasi faapitoa mo tamaiti a’oga, ole aai o tamaiti aoga, ma le tele o faamanuiaga o maua e tamafanau ale Teritori, o auauna ile militeri ma le malini ale malo tele o Amerika.
Ua faamauina foi le tele ole sao o tagatānuu o Samoa, oloo nonofo mau ai ma faigaluega i Tutuila. Pei ona faamauina i ana falei’a, ole tolu kuata ole aufaigaluega, o tagata atu i Upolu ma Savaii. T
alu ai ole tele o tagata ole teritori ua faasee atu ma nofo mau i Amerika i Matu, ma saga faaititia ai lava le faitau aofai o latou tagatānuu, tusa e i lalo ifo ole ‘afa ole faitau aofai o tagatānuu o Samoa, o ‘ainā ai Tutuila ma Manu’a. E lē o toe atoa se lua vaiaso ona masii atu loa lea o alii ma faipule ole afioaga o Saleimoa, ae ole latou aufaipese ma le ausisiva, e fai ma sui o Samoa i lenei tausaga e talivalaau ile faamantuina ole atoaga ole 118 o tausaga talu ona avea Samoa i Sasa’e ma teritori o Amerika.
