O le atinaeina o le lakapi iuni mo alo ma tama fanau a le atunuu i Ausetalia, o se auala lea ua toe lagaina ai se finagalo o le mamalu o Samoa o loo alaala ma papaao i lenei vaega o le kelope, mo le faatauaina o se sao taua mo le au a le atunuu le Manu Samoa, a o agai atu mo ana sauniuniga i le ipu o le lalolagi i le 2011 lea e faia i Niu Sila.
O lea faiga o le a avea ma se auala e uunaia malosi ai alii taaalo Samoa ina ia tepa taulai pea lo latou tomai i le taaloga, e fai ma auala e auauna ai mo le atunuu moni na soifua ma ola mai ai o latou tuaa ma matua, sa mafai ai ona faamaopoopo se au a alii Samoa lava latou ia i totonu o Ausetalia i lalo ifo o le luasefulu tausaga poo le Under 20 ma masii atu ai i ni taaloga faavaomalo lea sa faia i Apia ia Fepuari i le amataga o le tausaga nei lava 2009 i le Apia Park.
I se lipoti na tuuina mai e le tofa ia Nuafesili Tavita Sio, le sui o le Manu Samoa i Niu Sa Uelese nei i se fesootaiga ma le ofisa tutotonu o le au a le atunuu i Apia, na faailoa mai ai i se pepa o faamatalaga le filifilia o nisi o alii taaalo i le lakapi iuni se toaono e i lalo ifo o le luasefulu tausaga le matutua (U-20’s) e afua mai i le taamilosaga na masii atu ai ia Fepuari, e agavaa mo le faamoemoe o le au a le Manu Samoa i le lumanai.
O i latou ia o Marcus Ah Lam mai Sydney a le kalapu a Eastwood, John Totini mai Canberra, Ioane Sefo mai Melbourne, Winston Wilson mai Newcastle, Lemisio Faimoa mai Melbourne ma Richard Williams mai Sydney a le kalapu a Parramatta.
Saunoa le tofa a Nuafesili Sio i le vaega o talafou, e ui ina e lei filifilia nisi o alo o le atunuu sa malaga atu ae le mafai ai lava ona tuua ai le finau malosi o nisi o tama taaalo talavou a Samoa i Ausetalia nei mo le lumanai o le taaloga i se isi taimi o i luma.
Faaalia mai le suiga fou ua iai nei le pulega a le Manu Samoa lea ua mafai ona ofi atu ai sui taitasi mai atunuu i fafo: National Selector Panel: Fuimaono Titimaea Tafua, Fepuleai Selefuti Patu, Paepaetele Stan Toomalatai, Tuala Matthew Vaea, Aiolupotea Taufusi Salesa, Soifua John Schuster, Papaliitele Peter Fatialofa o Niu Sila ma Nuafesili Tavita Sio mai Ausetalia.
