Soo se tagata e valaauina e le Atua e fai ma fitafita tau mo lana feau, e ao ona talitonu i lona valaauina, auā o pule uma lava e mai le Atua lea.
E lei lafo malu le sami a o fatufatu lagona o nei tamafanau a le atunuu ina ua la vaai ma fefefe i lui o le aoga faafaifeau, peitai o ituaso o le tulili o peau, o ituaso ia o le TAUTAI o le Alii o Iesu e malū ai faiva.
O le alii failauga o le Talalelei, Falaula Ierome (Sagone), o ona tuaa, Faai‘u ma Malie Ierome lē sa avea ma faifeau o le Ekalesia Metotisi, lea ua fai i lagi le folauga faapea ma le alii talavou o Iosua Fuimaono Moemalo (Falealii & Puapua), o le alo o Fuimaono ma Moana Moemalo, o i laua uma o mamoe o le lafu mamoe a le susuga i le tausi matagaluega Ale Palelei i Kalaiesetete.
O ni uluai sui nei a le matagaluega ua faaolioli e fai ma fitafita tau mo le feau a le Atua, aemaise le fia ulufale atu i le Kolisi faafaifeau i Piula.
O se agaga faagaeetia lea ma ua mautinoa le lalago faatasi o le matagaluega e tapuaia le taumafai o nei alo o le ekalesia faatasi ai mātua ma aiga, ae faalagolago mea uma i le Atua o Lē ona le galuega.
O Iosua Fuimaono, o le atalii matua ae lona lua i le fanau e toafā, sa a‘otauina i kolisi i Kalaiesetete ma tuuvaa atu ai i Iapani mo ni tausaga auā le tomai faamusika faapea taaloga, lea la ua toe taliu mai i Kalaiesetete, faatasi ai ma Falaula Ierome, o le taitai ma le failauga o le Talalelei ae o se ulu matafale galue i totonu lava o le matagaluega.
Ua iai le faamoemoe o le a malaga faatasi nei sui ma le usugafono i fonotaga a le sinoti i Levin i le amataga o Iuni, ona faapea lea ona tapena le latou faigamalaga ma le susuga i le tausi matagaluega Rev Ale Palelei mo Samoa, auā suega ulufale i le Kolisi i Piula e faataunuuina i le aso 22 Iuni 2011.
Afai o le a manuia lo laua taumafai, e faapea ona faataunuu ai ma le la interview faapitoa a o lei amatalia fonotaga faaletausaga a le Koneferenisi Aoao i Samoa.
Talosia le faamoemoe o nei alo ua tausino i ai, e pei ona timai le laua faifeau ia faalologo ma faalogo, aua le finauvale ae ia ea le ala o le Atua ma le loto maualalo.
E avatu ai ma faamanuiaga a le matagaluega a Kalaiesetete, mai susuga faifeau malolo ma le aulotu o lea tapuaia ma tu‘i atu le mulipapaga mo la oulua suega ma talosia oulua faiva ia a‘e manuia i le alofa mai o le Tautai o Manu.
