Ua lē utuva pea le aliali mai o mataupu ua tuuaia ai le galuega faaleoleo i Samoa ma ua avea ma to‘a i le tautua lelei o loo faia i le ao ma le po e Malu o le Malo. O aafiaga o nisi o alii ma tamaitai leoleo i ni moliaga faasino i le tulafono o loo faatino ai le galuega faaleoleo faapea tuuaiga o ni gaioiga ua solia ai le tulafono, ua manatu ai le sui Komesina ua tulai mai i lenei masina ua tatau ona saili poo fea tonu ua mafua ai le faaletonu.
“O le faavaa o le galuega faaleoleo ma le tulafono o loo faatonutonu ai le galuega ma tiute o alii ma tamaitai ofisa o le a sailiili i ai e maua ai se tali o le mau faafitauli ua aafia ai le galuega faaleoleo,” o le finagalo lea o le sui Komesina le afioga Afamasaga Michael Soonalole ina ua fesiligia i sona finagalo pe aisea ua lē misia ai se masina ma se vaiaso ma faaletonu e aafia ai le tautua a nisi o leoleo.
Fai mai le sui Komesina e toalua isi leoleo ua faamalolo lē tumau o se alii ma se tamaitai o loo umia le tulaga faaleoleo o le taailua poo le corporal. O le mau fesili i le sui Komesina poo ā mafuaaga e lei mafai ona tali i ai, e oo lava i le faailoa mai o moliaga ma suafa o ia leoleo.
O se molimau e lei faamaonia ua ta’ua ai o le tamaitai leoleo ua faamalolo na lavea ai se tasi o taavale a leoleo, ao le alii leoleo o loo tuuaia ise mataupu na ia faaoolima ai i lona toalua. Saunoa le sui Komesina e faatoa iloa le auiliiliga o moliaga o ia leoleo ile faamasinoga ma o le aso Lua o le vaiaso nei e valaau ai o la moliaga ile faamasinoga faaitumalo.
“O le aafia o ia leoleo ma nisi leoleo o loo faatali ni faaiuga a le faamasinoga i o latou moliaga faapea leoleo e toafā o loo faamasinoina i le faamasinoga faaleoleo na faaalia manino e le sui Komesina o Afamasaga, e lē tuua ai le galuega lelei o loo faatino e se vaega toatele o alii ma tamaitai o Malu o le Malo.
E manatu le sui Komesina pe atonu o le lē lava o le silafia o nisi leoleo i le tulafono le mafuaaga o le aliali mai o faaletonu ua aafia ai, ae o se mataupu o le a maua se tali pe a mae‘a sana suesuega o loo faia i le taimi nei.
E lē natia i le silafia o le atunuu faitau nusipepa le tele o nisi mataupu faasaga i aafiaga o nisi leoleo ua lipotia e auala o faasalalauga ma o le molimau a le tusitala e lē o vasa‘i nei faafitauli o loo tulai mai.
O leoleo e toafā o loo faamalolo lē tumau o lea ua mae‘a le faamasinoga o leoleo e toatolu e aofia ai se alii leoleo satini, taailua ma se leoleo, ae o le vaiaso nei e faia ai le faamasinoga o le alii leoleo asiasi poo se police inspector.
O i latou nei o loo tuuaia i le faatamala i o latou tiute ona o le mataupu na loka ai se tamaititi 3 tausaga i le potu taofia faatasi ma le tamā o le tamaitiiti lea o loo molia i le aveina o se taavale e lei laiseneina.
