I Sini nei ua faalauiloa mai ele tamaitai Pule ole Faaliga laei ma suisui Pasefika poo le Pacific Runway International ia Failepou Peni, ua faamanuiaina nei ni a latou sui se toaiva e mo Paris, New York ma London, e faalauiloa ma maketi ai a latou oloa ma ofu. O lenei faaaliga faavaomalo e ta‘ua ole Oxford Fashion Week i nei aai tetele.

Faaalia e Failepou Peni ose faamanuiaga tele lea mo lenei toaiva mai Samoa, Pasefika ma Ausetalia. Sa uluai faailoa la latou taleni ma laei ile Sydney Fashion Show na faatumulia ai le Darling Harbour ile tausaga talu ai.

O i latou e toaiva e aofia ai Peter Tamasese (Queensland), Lepou (Sydney), Iki Haangana (New Zealand), Cecilia Keil (Samoa), Karen Lalotoa Abdul Rahman (Melbourne), Oli Laufale (Samoa), Hupfeld evers Hoerder (Fiji), PNGiant Kala (Papua) DMF (Samoa).

Ua iloa ai i lenei valaaulia mo le Oxford Fashion week le tāua ole Pacific International Fashion Show lea na amata faavaeina ile tausaga talu ai, ma ua avea nei ma avanoa e ulufale atu ai ile lalolagi lautele.

Ole a mafai ona faalauiloa ai a latou laei, ae ose auala foi e maua ai aikia mo le su‘iina o nisi sikaili fou. Ole taimi muamua lenei ole a auai atu ai nisi mai Samoa ma le Pasefika i lenei tauvaga tele.

Comments

comments