Ua faamautu le vaevaega o mataupu faasaga i ni alii se toafitu ua tuua‘ia i le faamalosi o se tamaitai e i lalo o le 20 tausaga le matua.
O le faalavelave na tulai mai i le tausaga na tea nei ma o se fiafia na valaaulia ai le tamaitai talavou lea e ni ana uo teine. Na iai le ava malosi i lea fiafia ma na ta‘ua na faasuaava ai lenei teine ma ave loa e ana uo e faamoe i se fale e latalata ane lava i le fale na fai ai le fiafia ae o iina lea na ta‘ua na tulai mai ai lea solitulafono.
O le aso ananafi na suia ai le tali a le toafā o nei alii ma ioe ai i nisi o moliaga e faatatau i lenei mataupu.
O le toafitu ua molia o Evan Foaimonuuese, Faatafa Jerry, Fagaesea Ropeti, Sale Esekia, Simon Iose, Manatualealofa Talataua ma David Alai‘asa, ma na tulai i luma o le Faamasinoga Maualuga faasaga i moliaga tuufaatasi e aofia ai le faia o ni uiga matagā, faiaiga faamalosi, faiaiga faasolitulafono ma le faaoolima matagā ua aafia ai se teine e i lalo o le 20 tausaga le matua.
O se moliaga matuiā ma o le amataga o lenei mataupu na tetee uma lava le toafitu i moliaga o le faamalosi o le teine ua aafia, o le taumafai e faamalosi lea tamaitai, o le faia o sauaga matagā ma fesootaiga faasolitulafono tau feusuaiga.
O le aso ananafi (Aso Gafua) na tulai ai alii e toafā o le aofai lea e toafitu, ma o a latou loia ua faaauala atu ai le ioe i nisi o nei moliaga ae aveese ai ma nisi o moliaga na tuufaatasia uma faasaga ia i latou.
O le aofai o moliaga ua aafia ai le toafitu e 12 ae e pei ona ta‘ua o le Aso Gafua lea ua toe faaui ai i tua isi moliaga ae tumau isi ae o loo tumau foi le toafitu i aafiaga o lenei osofaiga.
O Fagaesea Ropeti, Evan Foaimonuuese, Faatafa Jerry ma Manatualealofa Talataua ia ua toe suia i le Aso Gafua a latou tali, i le ioeina o moliaga ua faia faasaga ia i latou, e pei ona talosagaina e a latou loia.
O loo tatala pea i tua i latou nei e toafitu, i lalo o tuutuuga ma aiaiga a le Faamasinoga, ina ia saini i le Ofisa o Leoleo i aso ua atofaina seia oo i le aso e toe valaau ai lea mataupu.
O le aso 24 o Novema lea ua mae‘a faataatia, e faagasolo ai le iloiloga o lea faamasinoga, mo alii e toatolu ia e tumau le tetee i nei moliaga, i luma o le afioga i le alii Faamasino, Lesatele Rapi Vaai.
Ae o le tausaga fou e faatoa lauina ai le iuga o alii e toafā ia na sui i le Aso Gafua le tali i nei moliaga.
