To‘afā aufaipese ua sauni e saafiafi mo Tina i lo latou aso faapitoa

Ua faamae‘aina nei le faaiuga e pei ona logoina i luga o le leitio a le Penina o Asuisui mo se tauvaga pese tai to‘afā e aualofa ai ma faatāuaina le sao tāua o Tina i totonu o aiga. I le mae‘a ai o le tuuina i luga o le ea, e iai lava le uiga o nisi e faatali mo le minute mulimuli peitai sa alu lava i le faatulagaina ma le aso na faagata ai.

 
Ma ua mae‘a le faafitiga o aleaga e ala i se filifiliga toto‘a sa faia e le aufaigaluega a le leitio ma sui o aufaipese e fā sa auai atu i le po o le Aso Toonai i se fonotaga sa usuia i le pitonuu o Logan City. O le autu lava ma le ‘auga o aute o lenei tauvaga pese, o le faatāuaina lea o sao tāua o nai o tatou Tina i totonu o aiga.

 
O aufaipese la e fā o le a tauva e aofia ai le (1) Puna Sisters, o tupulaga talavou a le Ekalesia EFKS Southwest Brisbane, susuga i le toeaina ia Rev Tauaaga ma Senerita Mataafa; (2) Ioane Sisters, o alo o le susuga ia Ioane ma Nifo Ioane; (3) Four Gospel mai le Northside o alo o le susuga i le aafeagaiga ia Rev Siaosi & Tia Tuitama Mavaega o le Ekalesia Evagelia Uesiliana Metotisi Samoa Inala, ma o loo aoaoina foi i le Ia Malamalama Agape Bible College.

 
O le aufaipese lona (4) o Tamaiti o le Vaiula, o alo o le afioga ia Tuioti Setu ma le faletua ia Pasefika, faapea foi le ta kitara le susuga ia Tuilagi Motutoa. O le a amataina lea tauvaga i le po o le Aso Lua aso 6 o Me. Ma o le a tatala le avanoa mo i latou i Brisbane pe afai latou te fia faia se faaiuga o ia aufaipese, ua iai le faamoemoe a mae‘a loa ona pepese aufaipese nei e fā i lea po, ona tatala lea o le avanoa mo le lua itula e txt atu ai le tagata mo se aufaipese e fia ave i ai lana faaiuga ma palota i ai.

 

O le Aso Toonai aso 24 o Me o le a toe pepese uma ai aufaipese nei i le faamanatuina o le 5 tausaga talu ona amata mai le leitio a le Penina o Asuisui i Brisbane ma faia ai lava le faaiuga i lea afiafi poo ai se aufaipese o le a manumalo. O i latou uma o le a auai o le a tufaina uma i ai pepa e palota mai ai i le aufaipese ua ave i ai lona naunau ina ia manumalo.

 
O le tulaga muamua o le a maua le $1000.00 ma le ipu, tulaga lua e $500 ma le ipu, tulaga tolu e $250 ma le ipu, ma le tulaga fā e maua foi le faaailoga tupe e $250 ma le ipu. E iai foi nisi kamupani ma pisinisi ua ofo le latou fesoasoani e lagolago ai i lenei tauvaga pese.

Sui o aufaipese e to‘afā o le a fai sao mo viiviiga o le Aso o Tina i Brisbane