Ua maualuga pea le tautua a le kamupani lafo tupe ma tala ai tupe faamomoli o le Pacific Ezy Money Transfer, ona ua faaopoopo pea tausaga o lana auaunaga i le atunuu ma faaopoopo ai pea ma ana taumafaiga e toe faafoi ai i le atunuu faailoga ma meaalofa e amanaia ai le latou lagolago atu.
O le Aso o Sa o Tamā talu ai nei na faia ai lana faalauiloa ma Se‘i ai loa suafa o i latou e toasefulu ua faamanuiaina i faailoga tupe tailua selau tala.
O i latou nei na lafo mai a latou seleni mai i o latou tau aiga ma fanau i Niusila mo le Aso Sa o Tamā le Fathers Day.
O i latou ua maua nei faailoga o Asenati Matoka o Gataivai Savaii o lana seleni na lafo mai ia Ioane Mapuilesua, Solofa Sulusi o lana seleni na lafo mai ia Faatuatuaina Mauga, Uati Mago o Apia o lana tupe na lafo mai ia Vitoria Asoau, Silao Togia o Lotofaga (poo Lotofaga) o lana seleni na lafo mai ia Ioane Leo Togia, Faleti Lio o Sataoa o lana seleni na alofa mai ai Siutu Leofo, Malia Manua o Vaiusu na lafo mai lana tupe i a Steven Mikaele Ah Sam, Lini Tupuola o Aleisa na agalelei i ai George Thomson i se tupe na lafo i ai, Telorosa Enosa o Vaitoloa o lana foi tupe na alofa ane i ai Patricia Paeai Isaako, Tulolo Jnr Tulolo o Mulifanua na lafo mai i ai lana seleni e Tanya Mileta Finau, ma Lagi Afoa o Vailoa Faleata na ia maua se tupe faamomoli mai ia Galo Fagaiava.
400 pepa ulufale taamilosaga taitoafitu faavaomalo Ueligitone
O le isi lea o galuega ua ave ai le faatuatuaga o le ofisa o le Hai Komesina o Samoa i Niu Sila i le kamupani o le Pacific Ezy Money Transfer latou te faatau pepa ulufale e 400 mo le aulagolago poo supporters a le aulakapi tai toafitu a le Manu Samoa.
O le toe faamatuu atu e le pulega o le taamilosaga lakapi taitoafitu faavaomalo i Ueligitone Niu Sila o le avanoa e faatau ai e le kamupani lafo tupe ma tala ai tupe o le Pacific Ezy o pepa ulufale o le taamilosaga lakapi fitu faavaomalo i le tausaga fou.
O se avanoa lelei lenei e maua ai pepa ulufale a o lumanai lea taamilosaga ma e faamuta le faatauina o pepa i le aso 24 o le masina fou o Oketopa, a o lei amata ona faatau pepa ulufale i luga o fesootaiga televavave poo le initaneti.
E 195 tala Niu Sila i le pepa ulufale e pei ona faailoa mai i se pepa o faamatalaga mai le pulega o le Pacific Ezy Money Transfer, ma o le mamalu o le atunuu o alala i le laumua i Ueleigitone o le a mafai ona maua pepa nei mai le ofisa o le Hai Komesina o Samoa ae mo le atunuu o alala i Aukilani, o lala ma ofisa o le Pacific Ezy Money Transfer i Otahuhu, Otara, Magele ma Henderson, e faatau mai ai ma lesitala ai o latou suafa.
Faaalia o le faatuatuaga ua toe ave i le kamupani lafo tupe ma tala ai seleni faamomoli e mafua i le lelei faafoe o le faatauina o pepa ulufale mo tatou tagata lagolago i le tausaga ua mavae.
