To‘a 12 tamaiti maua sikolasipi mo Fiti

E to‘a 12 tamaiti aoga ua faamanuiaina i sikolasipi mo Fiti. O ia sikolasipi ua faaigoaina “Teaching Education Scholarships”, mo i latou ua faauu mai i latou i le Polokalame Faafaiaoga (Faculty of Education) i le Iunivesite Aoao o Samoa (NUS).
Na faatautaia le sauniga lotu e faalauiloa ai aemaise o le tuuina mai o ni fautuaga aemaise o timaiga mai le Matagaluega o Aoga, Taaloga ma Aganuu e ala i le Afioga i le Minisita, Afioga Magele Mauiliu Magele, auā le alo atu o i latou ua faamanuiaina o aoaoga o le a malaga atu i ai. E fā tausaga o le a tuua ai e i latou ia le atunuu aemaise o mafutaga ma mātua ma aiga, ae malaga atu i Fiti, auā le sailia o le poto ma le atamai.

E lua mataupu o le a agai i ai aoaoga a i latou ia, e aofia ai le Mataupu o le Faamatematika ma le Mataupu Faasaienisi. E mo le silafia e le mamalu o le atunuu, o le naunautaiga lea o le Malo e ala atu i le Matagaluega o Aoga, Taaloga ma Aganuu, ina ia toatele alo ma fanau o le atunuu e auina atu e aoaoina ia mataupu, ina ia agavaa ma maua le atamai ina ia faauu ma avea ma faiaoga e tauaveina ia mataupu i le lumanai.

E pei foi ona saunoa i ai le Afioga i le Minisita, Afioga Magele Mauiliu Magele i lana saunoaga autu o le aso e faapea, o nisi ia o mataupu o loo naunau le Matagaluega ina ia toatele nisi latou te tauaveina, ma avea ma mataupu latou te aoaoina atu i alo ma fanau o le atunuu. O timaiga ma fautuaga e pei ona saunoa i ai le Afioga i le Minisita, ina ia manatunatu i ai le ausikolasipi o le a malaga atu mo Fiti. “Ia outou toaaga e fai a outou meaaoga. Ia outou taumamao ese foi ma faaosoosoga a le fili.”
E tele luitau o le a feagai ma outou i le atunuu o le a outou malaga atu i ai, a o ia luitau e i ai nisi o le a faavaivai ai le ola taumafai i le sailiga o le poto ma le atamai, o le mafuaaga lea o le tuua o aiga, mātua ma le atunuu, o le faaopoopo lea a le Afioga i le Minisita.

“Ia outou mafaufau i le tou valaauina. O le a outou o ma foliga vaaia o ou mātua, o lou aiga, o lou atunuu i le atunuu o le a outou o atu i ai.”
“O soo se faafitauli e tulai mai, o foliga vaaia lea tou te o atu ma outou lea o le a vaaia i faafitauli ia o le a tutupu mai.”
“Ia outou manatua outou mātua, aiga ma le atunuu lea o le a tapuaia outou faiva lea o le a outou alo atu i ai.”

Na oo foi le fautuaga a le Afioga i le Minisita, i le tulaga o le toaaga e suesue ma sailiili, ina ia faalautele ma siitia lo latou tomai.
O ia sikolasipi e pei ona tauaaoina i nei alo o le atunuu, o le a faatupeina lea e le Malo o Niu Sila ma le Malo o Ausetalia. Na momoli le agaga faafetai o le ausikolasipi, e pei ona avea ai le alii o Sialofi Mamea e fai ma sui o i latou ua faamanuiaina e faafetai le Malo, le Matagaluega o Aoga, Taaloga ma Aganuu aemaise o mātua. O le faafetai i le Malo ma le Matagaluega ona o le sailiili i faamanuiaga mai isi Malo ina ia atinae ai le tulaga o aoaoga i totonu o le atunuu.

“Faafetai mātua i la outou lagolago aemaise o fautuaga e pei ona tuuina mai ia te i matou, i lea aso ma lea aso, auā se lelei mo i matou mo le lumanai.”

Nisi o fanau ua faamanuiaina mo sikolasipi i Fiti, faatasi ma faaao o le Iunivesite

Source