O se sauniga lotu tele na faatautaia i le Tooa Salamasina Hall i Sogi na faamanatu ai le aso tāua lenei o lenei tausaga, e manatua ai i latou ua maliliu i le faama‘i oti o le HIV/AIDS aemaise o le sailiili atili o nisi auala ina ia tamau i finagalo o tagata uma o Samoa e te oti i le HIV/AIDS e lē o iai se fofo e tafiesea ai i le taimi lenei.
I Samoa lava ia e to‘a 12 i latou ua faamauina o loo soifua pea ma le gasegase i totonu o le atunuu. O i latou ia ua faamauina. Talu ona oo mai le HIV/AIDS i Samoa ua faapea ona to‘a 22 tagata o lo tatou atunuu ua maua ai i le faama‘i ua faaigoaina o le faama‘i oti ona o le leai o se fofo ua maua e tafiesea ai.
O lea la ua to‘a 10 i latou ua maliliu e aofia ai le toatasi na maliu i le tausaga lenei, peitai o le isi to‘a 12 o loo togafitia pea ma ua maua fesoasoani e ala i fualaau ua maua mai i le Soifua Maloloina auā le fesoasoani ai e tau faasaga i le malosi o lenei gasegase.
O le vaitau o le 1990 lea lava na amata ai ona tu‘itu‘i mai le Matagaluega o le Soifua Maloloina i le atunuu ua aafia Samoa ma ua tele galuega ua faatautaia talu mai lea vaitau ina ia lava le malamalama o le atunuu mai i le fanau seia oo lava i tagata matutua i lenei gasegase, o auala ua maua ai tagata i le gasegase aemaise o auala o le tali e tatau ona avatu e tagata uma i soo se sui o le aiga e aafia ai i lea gasegase ona o le faamatalaga a le tina na matuā unaia le faalauiloa o lenei gasegase, le tina ia Peati … e matuā leaga atu le faasinosinolima o tagata nai i lo le feagai ma puapuaga o le gasegase.
O le HIV/AIDS e pei ona silafia o se siama ua matuā faaleagaina uma puipuiga o le tagata i lona soifua maloloina ma e ono maua ai lē e aafia i soo se gasegase ona o le faatamaia o sela lelei e le siama lenei.
E lē faailogaina se isi e ono maua ai ona o fanau e mafai ona pesia mai a o tauave e o latou tina. O feusuaiga le isi auala aupito taatele ua maua ai tagata i lenei gasegase, o le faaaogā tasi o tui le isi mafuaaga ma le fesootai o le toto o se tagata e maua i le HIV/AIDS ma se manu‘a poo se lavea i le tino o se tagata e lē maua ai i lea gasegase e mafai ona pepesi atu ai le siama matautia lea.
O le faigata lava e pei ona ta‘ua e le tamaitai o Peati… o le faatuputupulaia pea o le numera o tagata e aafia o le faatuputupulaia foi lea o le afaina o le tamaoaiga o se atunuu auā o le tau o fualaau e togafitia ai tagata ua maua i le HIV/AIDS e fai o le tele ae o le taugata ma o le mafuaaga lea o le malosi o le unai i polokalame ua faatautaia e lenei tamaitai i faalauiloa ua fai mo le Faalapotopotoga o loo galue ai, le Koluse Mumu i Samoa, ina ia taofi le maua ai o le tagata auā e faigata atu nisi gaioiga pe afai ua aafia.
O le tina ia Peati, o lona toalua ma lona atalii laitiiti o le la fanau e toalua ia ua maliliu ai i le gasegase ae na pesia atu ai ma ia ma o loo faaauau ai lava ona togafitiga. O le matautia o lenei gasegase e pei ona ta‘ua muamua o le faigofie ona apoia ai i soo se ituaiga gasegase ona ua lē mafai e le tino ona taofi le ofi atu o soo se siama lava ma lepeti ai le soifua maloloina.
O lea foi faatoa mae‘a se taotoga o lenei tina ina ia aveese ai se fula i lona susu ma o loo faasolosolo manuia pea o ia ma o loo faagasolo siaki e vaaia pe faamata e lei toe tupu se isi gasegase i lea vaega o lona tino. A lē inu foi fualaau e pei ona moomia i le gasegase o le HIV e matuā tele lava le aafiaga o lona soifua maloloina.
O le tausaga lenei e toatasi se alii na maliu ae ua faaalia e lenei tina le malosi o le latou fesootaiga ina ia faamalosi le tasi i le isi i le feagai ai ma lea gasegae faigata. Na mae‘a le sauniga lotu i le Maota o Tooa Salamasina ona aga‘i loa lea o le mamalu e oo atu i lea sauniga i Mulinuu o le a faapea ona faasolo ai moliga‘o mo le sami – o se faiga na amata mai lava i le tausaga e 2004 e tutu ai moliga‘o ma faatafea i le sami i le Penisula, ma o se sauniga ua manatua ai i latou uma ua maliliu ai ona o lenei gasegase.
