“E ono molia foi ni matai o le nuu”…leoleo
O le lagolago ane o alii ma faipule o le afioaga o Gataivai i Savaii i le galuega a leoleo, ua mafai ona faatino ai suesuega i le mataupu na aafia ai ni fale o se aiga o lea afioaga i le malaia talu ai nei.
Faaalia mai e le sui sooupu o le matagaluega o leoleo, e toa 13 taulelea o le nuu ua molia nei i le moliaga o le susunu fale poo le arson, ma o le aso 25 o le masina nei o le a valaau ai mo le taimi muamua o latou moliaga i le faamasinoga i Mulinuu.
Ua faafetaia ai e le pulega o le Matagaluega o Leoleo ma Falepuipui le lagolago a le afioaga i le faatinoga o tiute o le malu o le Malo o loo feagai ma lenei mataupu.
O loo faaauau pea suesuega a leoleo i le mataupu ma ua faailoa ai e le sui sooupu o leoleo, e ono molia nisi o matai o Gataivai ona o latou na faia le faaiuga e faatino le gaioiga na aafia ai fale o le aiga i le malaia.
E le o faailoaina mai e le sui sooupu o leoleo pe toafia ni matai o le nuu o loo masalomia.
O le faalavelave na susunu ai fale o se aiga o le nuu e mafua mai i ni mataupu tau faamasinoga o fanua ma suafa. Ua faailoa mai e se molimau, o le tausaga e 2008 na faia ai le faaiuga a le nuu e faatulai ese le aiga na aafia fale i le malaia, peitai ua taoto i le faamasinoga o fanua ma suafa se talosaga a lea aiga mo le toe fia foi i le nuu.
I se isi tala mai leoleo, ua faailoa mai e le sui sooupu le afioga i le Komesina Lagolago ia Salā Seaga Uili Lafaele, e le talafeagai le faaiuga na mafai ona alu ai le pagota o Tagaloasa Filipaina Faisauvale e saili fofō i lona aiga.
O le gaioiga foi a le aiga na faailoa ane ai i leoleo na agai atu e aumai le pagota ae faailoa ane se‘i manuia le gasegase, e le talafeagai ma ua faaalia e le sooupu o le matagaluega e ono faia i ai se suesuega.
O se isi mataupu o loo suesueina e leoleo i lo tatou atunuu o se taavale van lanu paepae e faapea a oo i le po ona alu lea tufa solo tupulaga tama mai le 15 i le 18 tausaga le matutua i le faamoemoe e talepe fale o aiga ma ave faagaoi ni meatotino tāua ma aogā.
Faaalia e Salā Seaga Uili Lafaele, o le lua vaiaso talu ai na oo atu ai ni molimau mai nisi o le atunuu na ta‘ua ai lea taavale van.
Ua faatupulaia soligatulafono o le talepe fale ma le gaoi i nuu tau lalata i le taulaga ma ua faaalia e le komesina lagolago, o fale lava o loo nonofo ai tagata mai fafo o loo galulue i le atunuu o loo pito mafatia i ia soligatulafono.
