E tele tulafono a Niu Sila e puipui ai tagata matutua, e tatau ona tatou nofouta uma i ai.
O lenei tina ua ave i le falemai ina ua tigaina tele mai i le Rest Home lea e nofo ai. Sa telefoni e le Rest Home le Ambulance e ave ai lea tina i le falemai ma sa taofia loa i le falemai. Sa ou asia lea tina ma ou mauaina e leai ni ofu aemaise ni ofumafanafana, leai se tioata, leai ni ana fualaau e masani ona inu, leai ma se ato na tapenaina e le Staff a le Rest Home, e tuu i totonu o le Ambulance, ina ua oo atu le Amublance e aumai lenei tina i le falemai.
Sa ou viliina le tagata e ona le Rest Home e ta‘u i ai mea na ou vaaia. O lo‘u talitonuga o le Rest Home Staff sa tatau ona latou teuina se ato a lenei tina matua e aumai i le falemai ma vaai lelei ia iai mea e tatau ona ia faaaogāina i le falemai i totonu o lenei ato.
Sa tetee mai lē e ona le Rest Home ona o lona talitonuga e lē o ia e iai le tiute, ae o ana tagata faigaluega, e vaaia tagata matuatua i totonu o lana Rest Home. E sese lea manatu ona o le tagata e ona le Rest Home e pa‘ū i ai le tiute maualuga (vicarious liability).
Sa ou ta‘u i ai le tulafono e faataga ai lo‘u vili atu e complain auā e pei tagata matutua ua mama‘i o tamaiti laiti. O tamaiti ma tagata matutua ua mama‘i ma ua lē mafai ona vaai e i latou ia latou ola ona ua mama‘i ma matutua, o tatou uma lava i le community i Niu Sila e iai o tatou tiute e tatou te vaaia tagata matutua ma tamaiti, ma lipoti ni mea o tatou vaaia o afaina ai latou ua vaivai.
Sa ou lipotiina i le tagata e ona le Rest Home lea e nofo ai lenei tina, ma aumai ai le tali a le pule o lea Rest Home, e lē o iloa e ia mea ia ou te talanoa atu ai. Sa ou fai i ai o lona tiute na te vaaia lana staff o loo faamoemoe o loo galulue i totonu o lana Rest Home. I luga o le tulafono o le tagata e ona le Rest Home o ia lea na te tauaveina complaints aemaise pe a afaina se isi i totonu o le Rest Home.
E ui ina lē fiafia mai lenei tamaitai i la‘u telefoni, ae sa momoli mai e le Rest Home i le aso na sosoo ai se atopa‘u lavalava ma momoli mai ma le tioata a si nei tina ua mafai ai ona vaai ma faitau ni tusitusiga a le falemai e tuu ia te ia e faitau ma saini. Sa aogā le faaseā i le Rest Home ona ua vave maua mai ai se fesoasoani malosi mo lenei tina.
O le tiute o tatou fanau ma aiga o le teu o se ato a se tagata matua e sauniuni mo se taimi e ave faafuasei ai i le falemai ae o loo mautu mea e ave e faaaogā i le falemai, aemaise lava tioata faapea ma mea faalogo.
Afai o iai ni o tatou mātua i se Rest Home, manatua e teu pea se ato e faaleoleo mo lea tagata, ina ia tulai mai se ma‘i faafuasei ma ave i le falemai e le Ambulance, ae o lea ua tapena se ato, ma ta‘u i tagata faigaluega i le Rest Home, e iai ni lavalava, tioata, ma mea faalogo ma ni vai o inu i lena taimi. Tusi i lalo vai e ave i le fomai pe a admit lea matua i le falemai.
E iai uma o tatou tiute i o tatou mātua. O nei tiute e lē gata i tiute i luga o le tulafono, o tiute na tatou ola mai ma i tatou o Samoa o le vaai, tausi lelei ma alolofa i tagata matuatua.
E sili le puipuia i lo le togafitia.
