Ole lona fitu o itumalo ua oo atu iai le polokalame Nofotane a Malo Aufatasi (UN) male Toomaga mo ē Puapuagatia, lea oloo fulisia ai manatu faaalia, ina ia aveese ia lea upu ole nofotane.
Na faatumulia ai le maota ole EFKS i Savaia Lefaga ile vaiaso talu ai, Aso Lua male Aso Lulu. E tusa ole 30, taitai, o faiupu o nuu, o ekalesia, o fono a tina, sui ole malo i nuu, tamaitai male alii, faapea Sa‘o o aiga ma Tuua o nuu. Ile saunoaga ale tamaitai oloo avatua lenei polokalame i tua, Tumua Tofete Luafalealo, “ole faamoemoe ole polokalame, ina ia aoaoina tamalii nei o nuu ua filifilia.”
Oi latou nei e faigofie ona sao atu o latou leo i tonu fai o nuu ma ekalesia, ae o faalapotopotoga. Ina ia aoaoina ma avea ai i latou o sui auai ole Toomaga e o atu i tua ma tala‘i atu auala e faatamaoaigaina ai nofotane, ma ia latou a‘oa‘o atu.
E lē gata o le mafaufau, tino ae ia mafai ele nofotane ona tulai mai ose tagata e lē faalagolago ise isi ile tausiga o lana fanau male aiga.
Na saunoa le Afioga Lemalu Faumuina Shirley Auvele: “Seiloga lava oute alu i Saanapu, faatoa ta‘u a‘u ose Nofotane, 100 pasene le mataupu. Ole upu Nofotane na faavae mai ai aiga Samoa, pe a maupaolo mai se isi. O lo‘u aiga e leai se upu lena e faaaogāina i lo‘u aiga, e ta‘u faatasi lava ole ma fanau ma fai faatasi uma mea i totonu ole aiga.”
Ua atagia ile finagalo faaalia o Lemalu, e fetaui tonu lava le polokalame lenei male vaitau o nei augatupulaga. Ae ile lagona faaalia ole susuga a I‘a Luamate, “ole mataupu lenei latou te lei faia i totonu o faiganuu, ae ua tou lagalaga loa, lea faato‘ā tilotilo alii ma faipule ise auala e fai ai.”
“Ole upu moni, ete nofotane oute faiava, ae a lē tutusa ta loto e lē malu le ta aiga. E lē o i lea e tupu ai le mea lea, ole nonofo nonofo nei lava, ita loa ile toalua alu fai le isi toalua.” Ua atagia mai ile manatu o lea foi sui auai, ua oo lava ile taimi e laga ai lenei mataupu.
Peitai na saunoa foi le Susuga Leapai Vaeloto o Savaia, “Ole masani ale atunuu, e taa le i‘a ile sami ua uma ona faasoa, e taa foi le manu ole vao ua uma foi ona iloa le tulaga e tatau ona iai, ae e lei fanau le tama ua iloa le tulaga tonu ua tatau ona iai.”
E lē tatau ona tatou faapea, ole poto male atamai, aua foi tatou te tilotilo ile taimi nei, ae tilotilo ile lumanai, auā a lelei ona fofoa mai e mātua, o mātua lava. E foliga mai ole polokalame lenei Nofotane ile finagalo faaalia o Leapai, ua alagatatau ai lava mo tupulaga o a taeao.
Ile finagalo faaalia ole susuga a Valasi Taualelei o Safaatoa, “O a‘u ole nofotane, sa tetea o‘u mātua o o‘u laititi ma afaina ai lo‘u mafaufau, ae ose tasi lea o vaega e aafia ai matou nofotane o totonu o aiga, ole uiga ona sa ou vaai iai mai o‘u mātua.”
“Ole aiga o lo‘u tina e tu lelei, ae o lo‘u tamā e aiga maualalo. Sa iai se lagona sogasogā ia te au e taumafai e fai se galuega, e ui ole vaivai o lo‘u tamā ae sa taumafai e faaaoga a‘u. E lei mafana mai lo‘u tina ia te au.”
“O lo‘u tamā sa ou vaaia lona pologa, ile tulaga tau faiavā, e leai se eseesega male nofotane. Ae na afaina ai lo’u mafaufau i foliga vaaia sa iai lo‘u tamā, ma sa ou faaaogā lava lona tigaina, ose lu‘i, sa ou taumafai ai e sue sa‘u galuega, a maua le galuega ma lelei le aoaoina, aisea e aafia ai fua tatou.”
“Ole matamoe, paie, ae ata ola finau ma tapē le mea na ou vaai iai a‘o o‘u laitiiti, e lē taumate ose tasi lena o aafiaga o afaina ai totonu o aiga. E lē mafai ele nofotane ona fai ise teine ole nuu, e iai le mea lea oute manao ai. Ae a faalapotopoto lava nofotane e mafai ona latou fefaasoaai lagona.”
Na atagia ai le tele ole manaomia o lenei polokalame i agai i luma o tagata uma. Ole mafutaga a tina ale Ekalesia Faapotopotoga Kerisiano Samoa a Savaia na talimalo, i aso uma e lua ole aoga.
Faaalia ai foi le agaga faafetai ole pulega ale Toomaga male poloketi ole Nofotane, ona oloo faaauau lava ona molimauina le talisapaia o nei polokalame e itumalo oloo faaoo atu iai.
E uma ane le lua aso ole mafutaga faaleaoaoga lenei i Lefaga, ua malilie uma lava i latou nei ile auga ole polokalame, ina ia faatamaoaigaina nofotane, aua ne‘i toe maua se sauaina, limavaivai, male ola faalagolago. Ua faatalitali nei foi la male toto‘a ile isi laasaga o lenei lava fesoasoani faaleaoaoga mai Malo Aufaatasi.
