Ole faaiuga lea ale NRL e faasino ile alii Samoa Tim Simona 25 tausaga, na taalo mo le au ale West Tigers. E mafua lea ona o petipetiga a Simona i taaloga ale NRL na taalo ai. E matua faasāina lava ile tulafono ale NRL ia faiga. E le na‘o Simona, ae e foliga mai e toatele o isi tama taalo e petipeti i taaloga. Ae ole faaiuga ale NRL, ua faaleaogaina ai le Resitara a Simona e taalo ai i soo se ‘au ale NRL. E faasāina foi ona auai i tapenaga ma toleniga a soo se au i totonu ole NRL.

Ole masina na tea nei sa faailoa ai e Ross Greenberg le taitai ole NRL, ole matua tetee ole Lakapi Liki a Ausetalia i petipetiga i taaloga. Ole fatu o lea talitonuga ale NRL ona o petipetiga ole a soloia ai ma le malosi ole taaloga. Na uluai folafola lava e Greenberg, e le o toe mamao ae tuli ese mai le NRL se tama taalo ona o petipetiga, peitai, o lea ua taunuu ia Simona.

E le o manino lelei le faasalaga ua faia ia Simona ele NRL, e tele foi fesili na tuuina atu ele aufaasalalau ile NRL e tusa ai ole latou faaiuga, peitai, e le o tali manino mai iai le NRL.

E pau le mea ua mautinoa e pei ona lipotia ele News Corp a Ausetalia, ua motu Simona mai lana konekalate ile NRL.

Oloo tetee nisi o tama taaalo ile faasalaga e pei ona faaalia e Mitchell Moses ole Tigers, e matuā mamafa tele lenei faasalaga ua faia ia Simona. “E le tatau ona faasoloatoa le faasalaga mo Tim Simona,” ole tala lea a Mitchell Moses. “E tatau ona faasala, ae ole tuli motu e le mafai ona toe taaalo, ose faaiuga saua tele ma le lē sa‘o.”

E le na‘o Mitchell Moses e iai se lagona faapea. Taua ele Big Sport Wend i lana tweet, “E matua maoae tele le faasalaga ole tuli motu o Simona e le toe foi mai ile NRL.

Ua ripotia mai ele Tigers, e le oni petipetiga tetele ia na fai e Simona ma isi tama taalo. Mae e le mautinoa foi pe sa‘o ia ripoti pe leai. Talu ai ia tulaga, ua faailoa ele Tigers le tele o faaletonu oloo feagai ma Simona. E iai le taufaamata‘u ua faia e nisi i lona toalua, ua folafola e nisi i luga ole telefoni le fasiotia ole toalua o Simona.

E le gata i lea, ua faailoa e nisi ole au, e pei o Moses, popolega ile latou uo. I nisi o ripoti ua maua, ua fautuaina ai le NRL e ao ma tatau ona mamafa faasalaga, ae e tatau foi ona vaai ma le alofa i tagata taitoatasi ua ripotia i petipetiga, e iai Simona.

Ole tuli ese o Simona mai le taaloga ole taimi muamua lea talu mai le 2010 lea na tuli ese ai Ryan Tandy ona o petipetiga foi. Ua fautuaina ai ele NRL tama taaalo uma ia aveesea le Betting App mai ia latou telefoni. E foliga ua matua faigofie petipetiga i taaloga ile iai o avanoa faapenei.

O Simona na fanau i Niu Sila. E lima ana taaloga mo le Toa Samoa. Ae o ana taaloga e 79 mo le NRL, na taalo uma ile au ale West Tigers. Ole 2011 na amata ai o ia ile Tigers. O lana taaloga muamua na taalo ai le Tigers ma Newcastle Knights.

Ole 2014 na uluai filifilia ai o ia mo le Toa Samoa ile taaloga ma Fiti.

Ole 2015 na taalo ai ile Auckland Nines, ma toe filifilia ai foi o ia mo le Toa Samoa ile taaloga ma Toga. Na toe foi ile Nines ile tausaga ua tea, 2016, ma Samoa ile Polynesian Cup. E 21 ana taaloga mo le Tigers ile NRL ile 2016.