O le muai afea ai o lene aai o Kuiniselani e lana auauana mai Samoa, ua faatusaina o se teuteuala e pei o le galuega na faia e Ioane le Papatiso na muai teuteu le ala a o lei afio atu le Faaola. O le itu i la le tino nei e leai se eseesega ma le galuega a le Atua pe a iai se manaomia.
O le auga o aute o le susū mai o le Lupe faalele a Saleimoa ma Falealupo, o le faatagisia lea o se fesoasoani i alo ma tamafanau, paolo ma gafa e malu ai le nuu o Poutasi Falealili ina ia tatala finagalo e tusa ai ma le manaomia mai Samoa.
E tasi le vaiaso na iai lana auauna iinei, le susuga ia Rev Letone Uili o le faafeagaiga o loo galulue ma le faletua ua iai nei i le Ekalesia EFKS a Poutasi Falealili. E pei ona silafia o le faafeagaiga lea na maliu si ona faletua i le sunami i le 2009.
Ua fuafua o le Aso Toonai, 13 o Iulai o le a to‘ai taunuu mai ai le aumalaga a sui o le aulotu mai Samoa i le Aso Toonai auā le faamoemoe lea ua atofaina mo le Aso Toonai 20 o Iulai.
O fuafuaga o lea taeao o se tusigaigoa o se sailiga seleni e toe faaleleia ai le malumalu o le Atua ma le maota o le galuega e pei ona faaleagaina i le sunami ma le maema‘eā o le afā o Eveni i le tausaga ua mavae.
O le Aso Sa, 30 o Iulai na faaafe ai e le susuga i le toeaina ia Rev Tauaaga ma le faletua ia Senerita Mataafa ma le EFKS Southwest le susuga ia Rev Letone Uili mo se upu folafola auā foi le faafofogaaga a le ekalesia, ma na logomalie tapenaga, faapea foi ona alo le ekalesia e tali atu i se matūpalapala o lana auauna.
O le susuga i le toeaina ia Rev Tauaaga o se tasi o auauna a le Atua o loo fesoasoani i le faamoemoe faapea alo ma tamafanau, paolo ma gafa a Poutasi i Brisbane.
O le Aso Toonai, 6 o Iulai na toe taliu atu ai le faigamalaga a le susuga ia Rev Letone Uili i Samoa e sauni mai le aumalaga a sui
o le ekalesia.
