“Ose ta’ita’i e lē fefe e finau mo mea lelei auā le lumanai o alii ma tamaitai tausi soifua faamauina o Samoa”
Ole a lē galo i taimi uma i mafaufau ma loto o alii ma tamaitai tausi soifua faamauina o Samoa le mafutaga ma lo latou Peresetene le afioga Taulapapa Fesola’i Talailelotu Faamanatu Faletoese Nielsen, na amia e le Matai Sili ile vaiaso tonu oloo lumanai ai le Kerisimasi ole 2017.
Ole aso tonu lea oloo tapena le fiafia faaiu ole tausaga ale sosaiete e pei ona faailoa mai ele sui Peresetene le susuga Solialofi Papalii Pisimaka, ae faate’ia ai ina ua oso le tiga ole ulu ole Peresetene a’o iai i lona ofisa e sosoo ma le hall ale sosaiete i Motootua, ma nanati atu ai loa mo se fomai ile maota gasegase e lē mamao lava ma le nofoaga o iai le ofisa tutotonu ole sosaiete. Na faaalia e Solialofi e ui ina sa vave ona taunuu e vaai se fomai peitai ua tuumalo lava le Peresetene. Ose tala na faate’ia ai tausi soifua auā sa leai se isi e manatu ole taimi lenei ole a motusia ai le mafutaga ma le tina matua poo le Peresetene.
“Ose ta’ita’i e le fefe e finau mo mea lelei auā le lumanai o alii ma tamaitai tausi soifua faamauina o Samoa, auā o lenei tina o lona fatu atoa ole siitia o tulaga o tausi soifua ile itu ile a’oa’oina lelei ma e finau foi ia lelei totogi o tausi soifua”. Na faaalia foi ele sui Peresetene e lē galo le loomatua i ona uiga mālie ma ona uiga pe a oo ina siisii sona manatu ini mataupu ogaoga e fetaia’i ma le sosaiete.
Ole soifua galue ole Peresetene ose tausi soifua faamauina ina ua mae’a ana a’oa’oga ile A’oga Faatausi Soifua i Motootua ile tausaga e 1956. Sa galue ose tausi soifua ile falemai i Sala’ilua i Savaii ile va ole tausaga e 1958 ma le 1959. Na faauu ose tausi soifua faatosaga ile 1967 mai le a’oga tausi soifua o St Helen i Niu Sila ae na maua lona faailoga ole Post Graduate Midwifery ile mae’a o ana a’oa’oga ile tausaga e 1974 agai ile 1975. Sa galue ile falemai i Lalomanu Aleipata ile va ole tausaga e 1982 ma le 1989.
Ole 1984 na maua ai lona faailoga i galuega faatausi soifua i nuu ma afioaga i tua poo le community nursing. Peitai ina ua amata galue ile sosaiete a tausi soifua sa uluai avea o ia ma Failautusi ale sosaiete ile tausaga e 1972 e oo ile tausaga e 1978. Ole tausaga foi lea e 1978 na see atu ai loa e tauave le tofiga Peresetene ole sosaiete ile aso 22 o Tesema, ma ose galuega na ia tauaveina mai lena taimi e oo ina valaauina e lona Matai ile lagi.
Ole tausaga e 2005 na faaee atu iai ele Malo le faailoga taualoa ale Ao Mamalu ole Malo ole Head of State’s Service Award. Sa avea ma taitaifono ole Fono Aoao a Tausi Soifua Samoa ma sa malaga foi i Iapani ile tausaga e 1977 e faaulu aloaia le sosaiete a Tausi Soifua o Samoa ile Fono Aoao a Tausi Soifua ole Lalolagi.
Ole molimau ale Pule Sili ole vaega o auaunaga ale soifua maloloina le faletua o Palanitina Tupuimatagi Toelupe, na ia faamatala ai galuega e tele na faia ele Peresetene. Ole fausia ole hall oloo iai nei a tausi soifua, ole toe fausia ose nofoaga e faamautu iai tausi soifua, ole nofoaga ua avea nei ma vaega e faatino ai galuega mo le faatulagaina o a’oa’oga a tausi soifua, ma le faatuina ole sosaiete ole gasegase ole suka.
O taimi sa faia ai solo tetee a tausi soifua na molimau Palanitina e lē solomuli le Peresetene ile faamaopoopo ole mau e faavae ai se tetee aemaise lava o faamanuiaga tau totogi. “Ole loomatua lenei e lē ose tagata e faigofie auā poo ai lava e faauluulu iai vaega eseese ole matagaluega ale soifua maloloina e oo lava iai le pule a Faamanatu.”
Na faamatala Palanitina i lana molimau o ia le isi e ilitata tele iai le Peresetene pe a lē faia le mea e manao iai, ae sa ia lē fefe foi e faailoa iai le mea e tatau ona fai.
Ole Aso Toonai na tea nei na lagomau ai le afioga Taulapapa Fesola’i Talailelotu Faamanatu Faletoese Nielsen i lona aiga i Moataa.
E tuumalo le tina matua poo lē sa avea ma Peresetene ole sosaiete a tausi soifua o Samoa ua 84 tausaga o lona soifua.
Ole afioga ile Palemia susuga Tuilaepa L Sailele Malielegaoi na faia le molimau a le Malo ile olaga galue ole Peresetene, ma sa faatino ai ma le faaaloalo maualuga faalemalo ole ufiina ole Sa ole tina ile tagavai poo le Fu’a ma tauave e leoleo poo Malu ole Malo lona Sa i taimi ole sauniga lotu ile Malumalu EFKS i Moataa seia oo lava i sauniga i lona tuugamau.
