Vui Masinamua

Vui Masinamua

Ou te faatulou atu lava Samoa i lau faafofogaaga ma lau faitau i luga o lomiga a le Samoa Times. Tulou le paia o Aiga ma Tama, o Tama foi ma Aiga. Tulou la oulua Usoga Tumua ma Pule. Tulou oe Ituau ma Alataua. Tulou Aiga i le Tai ma le Vaa o Fonoti.

Ou te faatulou foi i le faafogafoga tapuai a le Motusa. Tulou oe Sua ma le Vaifanua o Saole foi ma Saleaumua ma le Launiu Saelua. Tulou Faatui ma le Auvaa o Tootoo. Tulou le Laau na Amotasi ma Upu i le Manu’atele. Tulou oulua Tutuila ma Manu’a.

Ou te faatulou foi i lo’u nuu ma lo’u itumalo, ona ua oia lava ma afaina ona o nei tuuaiga le sa’o ma le lē amiotonu. Tulou le Falefa o Alo o Vui. Tulou oe le Maopu. Tulou le afio o Falenaoti. Tulou le afio o Alo o Vaafusuaga. Tulou lau tofa i le Matua Fetalai. Tulou oe Salemuliaga o le Faleupolu o Tofiga.

Tulou Aiga e Fia o Satuala o oe o le Aiga na Mua i tofiga o le Aiga Faalagilagi. E ao foi ina ou le faagaloina le tapuaiga a le afioaga ma le Itumalo o le Alii Palemia.

Tulou le afio o Faolotoi. Tulou le afio o le Maopu Taulagi. Tulou le afio o Tupua le Aloalii. Tulou le afio o Sagapolutele ma Alalamalae. Tulou le afio o Tupuola ma le Matua o Tago. Tulou le afio o le Usoalii. Tulou oulua Tamapunefu ia Auelua ma Fatialofa. Tulou lau tofa Malielegaoi ma le Faleatua ma Salefao.

Ou te faapoipoi foi i lo’u nuu na ou ola ma fanau mai ai. O le fatu i lo’u Tama ma o’u Auga Tama.

Tulou ia le afio o lo outou Tapaau o le Tui-Aana ma ona Tafa’i. Tulou le afio o Sooa’emalelagi ma Alo o Tamalelagi. Tulou oe le To’aiva ma lo outou Matua na Togi. Tulou lau Fetalaiga Leulumoega na e Uluai Tumua.

Ae le mafai ona ou faagaloina Tae oi Atua i le tapuaiga i le Au Faitatalo o le Aiga o Salevi. Tulou le Paia o Feoi o le Talalelei, o so matou Gafa e tau i le Lagi, tulou ia tulouna lava. Faatulou i le paia o Samoa faafogafoga, aemaise ai nai o’u aiga ma a’u uo ma a’u paaga.

Ioe Samoa, ua le o toe po ma faanenefu i lau faafogafoga le lealea mai o faasalalauga a le Talamua i lana faatalanoaga ma le alii palemia o Samoa, le susuga ia Tuilaepa Sailele Malielegaoi. Ua faamauina ai lona finagalo ma ia tuua’ia ai se tasi o tamalii Samoa o loo alala ma papaaao i Amerika ma lo’u nei vaivai (Vui Seigafolava Sione MASINAMUA) e faapea o maua o tagata tonu ia o loo i tua o tusitusiga a le Itulau Saualii lea o loo lauiloa o le OLP.

Talofa ua aliali ai le vaivai o lenei palemia ma lona tau faamata’u pea i tagata o le atunuu, ae faaaogaina ai le Tofi Palemia o le atunuu e lafi ai pea i tua ma lona faamaualuga.

Ua le gata i ana tuuaiga lē faavaea ma lē amiotonu, ae ua ia toe lalauina ai i ma’ua ma faaaogaina ai le upu “Tataa”. Ae faapea foi ona ia lalauina ma’ua ma faaaogaina le upu “Fouvale i le Malo”. O lona faaaogaina o le upu “Fia Palemia”. A’o le sili ona ogaoga ona o lona faaleagaina lea o ma’ua igoa ma lea tamalii i ana tuuaiga e leai ni molimau ma ni faamaumauga e faamaonia ai.

O le vaega e maofa ai le loto, ona o a’u nei e le fou i tagata o le atunuu ma le alii palemia ma lana faigamalo, lo’u faatautee pea lea ia latou fuafuaga i le toeitiiti atoa le 30 tausaga o finau ai pea ona o uiga faaletonu a lana faigamalo. O le tele o nisi o tausaga sa matou soalaupule faafesaga’i ai lava ma le alii palemia ma nisi o ana minisita ona o ia vaega.

O lona uiga la lau afioga i le alii palemia, o Vui Seigafolava MASINAMUA. E leiloa ona lafi i tua o se isi poo ni tusitusiga faasaualii e faailo ai o’u lagona. O lea lava ou te saofai atu ma faaaliali atu o’u foliga ma a’u upu ma tala e lu’itauina ai oe ma lau faigamalo. Ia e silafia foi o le tele o lo’u olaga sa ou tautua ai i Upufai i le atunuu, o le tele foi lea o lo’u iloa i le Faavae ma taualumaga o faigamalo ma aga a Malo.

Sa ou luitauina oe i ni a ta talanoaga faafesagai a’o o’u faatinoina le Talk Back Show i le Talofa FM ae e te lei taliaina. Sa ou tusitusi atu foi mai Ausetalia ma Niu Sila i se avanoa e ta te talanoa tuusa’o ai, ae o lau tali mai lava o le leai. Sa ou talanoa atu i se avanoa tatou te talanoa toatolu ai ma le afioga Le-Mamea Ropati Mualia a’o Ta’ita’i ai le Itu Agai, ae o lau tali mai ou te malie e le toe faia nisi palemene i luga o leitio.

Ia e silafia lelei, o a’u o le matai Samoa ma e maualuga ia te au lo’u tauaveina o Samoa i atunuu i fafo. Ua molimauina lea e Samoa o Ausetalia. O lo’u Falemaliu e momoli ana faaaloaloga i Tu ma Aga Faasamoa. Pe tau malulu pe tau vevela e faatinoina lava. E faapena foi i taimi e valaauina ai a’u i soo se fuafuaga i palemene o Ausetalia, ou te alu lava i a’u Tu ma Aga mamalu Faasamoa.

O soo se savali e faailoa ai le tetee o tagata i uiga o faigamalo a le atunuu lenei o Ausetalia, e mataina ma tuliapu a’u nei e le media ona ou te savali ai e faailoa i tagata uma ma ou mimita e faailoa o a’u o le Samoa i lo’u ie siapo ma la’u ulafala ma lo’u fue.

O la’u mau i la’u polokalama, poo fea lava e oo i ai so’u le fiafia i lau afioga i le alii plaemia ma lau faigamalo, e le mafai ai lava ona ou faaaogaina se upu masoa i lau afioga ona o loo e seei pea i le Tofi Palemia o le atunuu. Ona ou te talitonu, e le o se tofi o oe ma lou aiga, poo lou afioaga ma lou itumalo, ae o le Tofi o Samoa. O le tele o taimi ou te sa’i ai i le OLP ona o lona faaaogaina o le gagana masoa e lalafo atu i lau afioga ona e le se mea totino a oe ae o le Tofi o Samoa. O vaega ia ou te matua lagona ai le faanoanoa i au tuuaiga ma lau taufaamata’u.

E ao foi la ona ou faapea atu i lau afioga i le alii palemia, ina ia e mautinoa o lava ni au mau ma ni lagisoifua e tau te taaalo ai i le Faamasinoga e tusa ai o lou faaleagaina o lo’u igoa aemaise o le Suafa o lo’u aiga ma lo’u nuu pele i au tuuaiga.

Masalo ua galo ia te oe le upu o le Tusi; “O LE LAAU LAVA NA FAFAU E NAAMANU NA TOE TAUTAU AI LAVA”.

Ia e silafia ua uma ona e toe faafoi mai le tulafono o le Libel Law ina ia faasalaina ai tagatanuu Samoa o loo e talitonu o loo latou faia ni faasalalauga le sa’o ma lē faamaoni e faaleagaina ai oe ma lau faigamalo, ae ua galo ai ia te oe, o oe lava lea o le a muamua faataunuu i ai lea tulafono.

Ae o lau tulafono lea ua matua solia ai le Faavae o le Malo Tutoatasi o Samoa, i le Aia saoloto o soo se tagata Samoa e Tautala ai, E faaalia saoloto ai ona lagona ma ona mafaufauga (Freedom of Speech and Freedom of Expression).

I le ma le isi, ou te faamanatu pea i lau afioga i le alii palemia, pe afai lava ua leai lava se isi o lau faigamalo e iloa ona fautuaina oe e faapea, “O le avea ai o lau susuga Tuilaepa Sailele Malielegaoi ma Palemia o le Malo Tutoatasi o Samoa, e te le tafili saunoa ai lava oe ma pule oe i au saunoaga tuulafoai e tagaui ma lafo mai i le atunuu.

O lou taliaina o le tofiga lena, o lou taliaina foi lea o finagalo ma faasea a Tagatanuu Samoa e ana le Malo lena o loo e sapi ai. Ae afai la e te le lavatia ona tatali faitioga a tagatanuu Samoa, ona lelei lea ona e faamavae lelei ae see atu se isi tagata e lavā ona tauaveina faitioga. E le o se Tofi e saili ai ni viiga, ae o le Tofi e faatino i le Tofa Faatupu ma le Faautaga Faafaleupolu, ae liolio mea uma i le Faaaloalo.

Ia ao ona e manatua, o aga a malo Temokarasi, e Faavae i le Mau Tauave lea; Malo o Tagata, Favaeina e Tagata mo Tagata – “Government of the People, By the People, For the People”. A faamatalaina la e faape, “O le Malo o Tagatanuu Samoa, e Faatuina ma Faavaeina e Tagatanuu Samoa, e Tautua mai i Tagatanuu Samoa”. O lona uiga o le Malo poo Palemene ma soo se faigamalo, e Tali mai i Tagatanuu, ae le o le Tali atu Tagatanuu i le Palemene ma soo se faigamalo, e iloa ai o se Malo ma ni Faigamalo valea. Soia e te fuaina le atunuu i le Fua Faatautau leaga e le valea Tagatanuu Samoa. E manaia ae toe fuata’i lou taeao ma toe sasaa le fafao ma saili lau aupega faaleatunuu e te tau mai ai, ae soia e te faamoemoe i lou poto a’oa’oina, leaga o ina tonu lea ua e le fuafua tatau ai i ou finagalo faaalia. Manatua e leai lava se isi e tu faamauga i le olaga lenei, e sau lava le tau ma lona Tautai. O Tautai atamamai foi o le atunuu, e fua lava mea uma i le Tau, ae le fuaina le Tau i lona atamai. Aua a le sa’e ai lona Sa, e fano ai ma malemo ai.

O la’u fautuaga i le vaega muamua lea o la’u tali atu i au tuuaiga lē faavaea, e lelei le fai malu ou faiva, ma mautinoa o moni ma atoatoa au lagi soifua e tauaveina ai lou finagalo, ae leaga lou maoaluma i au upu faalele, ona ta’u mamaina lea o oe i le maitau a Samoa ma le lalolagi. Ma taalo atamai, ae aua le taalo i le tino aua e iloa ai lou vaivai i le faagatama.

Samoa le atunuu pele, o lena ua fofola atu sa’u faamalamalamaga mo lou nofo silafia. Ou te talitonu foi o le a avea so’u vaivaiga ua fofola atu, e avea lea ma malamalamaaga i lou finagalo ma lau tapuaiga. Ae afai foi ua iai se upu a a’u nei ua sopolagi i lo tatou va nonofo ai, ou te faamalulu atu lava. Ae ou te faamoemoe o le a vaatele ane i lou finagalo se vaivai o a’u nei.

Alofa mai le Atua o Malamalama, le Atua o le Amiotonu, le Atua o le Faamasinoga Tonu. O le a Ia faamanino ma faamalamalamaina mea tonu uma i le aai o finagalo. Alofagia foi e le Atua o Samoa le tofa i le alii palemia, ina ia ia silasila ai i le taua o Samoa ma lona Tofi, ae le o le fai mea tuulafoai ne’i pei ta’ua o Neiafu na mele ai le To’elau, ona pei lea o le upu na fai i le Tupu o Taufau.

Soifua

Vui Seigafolava Sione MASINAMUA