Ua amata nei ona valaau molimau e sefulufitu a leoleo e lagolago ai moliaga o ni alii talavou se toalua sa aooga i le Don Bosco i Alafua o loo molia i le taumafai e faaoo le maliu i le tamaitai o Francella Tuala o Falevao o se tamaitai sa aoaoina i le Kolisi o Leifiifi.
O Joseph Ionatana o loo molia i le taumafai e faaoo le oti ma le faaoo manu‘a tuga. O Komiti Ene o loo molia i le fesoasoani e faatupu le solitulafono na aafia ai lea tamaitai aoga i se pomu fagu karasini e mafua i se vevesi a nisi o aoga maualuluga i le taulaga i le vaega faatali pasi i tua ane o le filī maketi i Savalalo i le aso 25 o Aperila o le tausaga e 2008.
O se laulau o faatonu o loo iloiloina molimau o le mataupu, ma e toatasi se faatonu e iai sona sootaga faaleaiga i se tasi o tamaitai loia o loo tulai mo se tasi o taulealea o loo molia. Peitai ina ua fesiligia e le alii faamasino o Justice Pierre Slicer lea faatonu pe iai se afaina o lea sootaga i le faatinoga o ona tiute, ae sa tali le faatonu e le o o se taimi muamua lea ua avea ai ma faatonu o se mataupu e suesueina i le faamasinoga, ma e faia lava ona tiute e aunoa ma se faaituau.
Sa tetee loia a leoleo i le sootaga o lea faatonu ma le loia, peitai ua talia e le faamasino o Justice Slicer le faamatalaga a le faatonu ma ua talitonuina foi e le faamasinoga le tutoatasi o ona tiute i le mataupu o loo suesueina. Faaalia e le itu a leoleo o le tamaitai na aafia o le isi lea molimau autu a leoleo faapea nisi o tama a‘oga o le Don Bosco sa iai i le taimi na tupu ai le vevesi.
O le vevesi lea na togi atu ai e Joseph Ionatana le pomu fagu karasini i le vaega sa iai tamaiti a‘oga Leifiifi ma aafia ai loa le tamaitai na aafia i le afi. Sa iai ma le tasi o i laua o loo molia o Komiti Ene lea na faaalia e loia a le itu a leoleo i le latou folasaga amata, sa avea ma tama ulu o le a‘oga i lea vaitaimi poo le Head Boy.
O loo finau le itu a leoleo o le iai o Komiti i le tumutumu o fanau aoga i le aso na tupu ai le faalavelave na fesoasoani malosi lea i le faatupuina o le faalavelave. E 4 aso o loo suesueina ai molimau o lenei faamasinoga ma e tatau ona maua se faaiuga a se laulau o faatonu o loo iloiloina molimau i le lua vaiaso taimi i Samoa.
O le vevesi a tamaiti aoga e pei ona aafia ai le tamaitai o Francella Tuala na mafua ai ona taofi e le Malo taaloga a Kolisi ma aoga maualuluga i le atunuu ae ua toe tatala nei ina ua toe iloilo e le kapeneta le talosaga a le Matagaluega o aoga lea na faia ai le faaiuga i le tausaga ua mavae e toe faatino taaloga a le fanau.
O le vevesi foi lea na avea ai le taitai o le Ekalesia Katoliko le afioga Moseniolo Alapati Mataeliga ma sui o le ekalesia faatasi ai ma le lagolago a le Ao o le Malo na faia ai se sauniga na teuteu ai le feeseeseaiga o fanau aoga.
