Tetee sui o le Liberal o Hadid i faiga faasotoma

A o sauni atu Niu Sa Uelese i lana faigapalota i le Aso Toonai nei 28 o Mati 2015 na valaaulia le sui faaolioli o le Liberal ia Mazar Hadid i luga o le Leitio FM89.3 le Samoa Sportstar e saunoa i nisi o fuafuaga a lana vaega faaupufai pe a toe pale mai i le tofi o Liverpool o loo ia umia.

Na faaalia e le faatonu ia Leilua Jerry Uesele, o lenei polokalame o loo silafia ai e le mamalu o Samoa i Sini fuafuaga i tulafono faaofi a le faigamalo a Niu Sa Uelese faapea le atunuu tele ma sa saunoa loa le sui faaolioli ia Mazar Hadid i tulaga e pei o le Eletise faapea aoga.

Sa tuuaia e Hadid o se alii Lepanona ua atoa le luasefuulima tausaga o alala i Liverpool, o le vevesi o iai nei i le Faatauina atu o le Eletise o se faaiuga a le vaega faaupufai a le Leipa (labour) i taimi na iai i le tofi.

Sa ia toe tolaulauina i suafa o i latou na folasia ma faafoeina nei faaiuga i tausaga ua tuanai e pei o le susuga Bob Carr, Morris Iemma, Mark Latham ma nisi. E oo foi i le siitia o pili o Iunivesite ma sailiga faailoga maualuluga ua iai mo le lumanai sa fafau uma mai faigamalo a le Labour ua tuanai atu.

O se mataupu na tutuaai ai le susuga i le faipule faaolioli o le fesiligia lea i le mataupu lava lea o le faaipoipo o le tane i le tane poo e fafine i le fafine ae peitai na matuā mausali lana tali. “O au nei o se tagata talitonu i afioga paia a le Atua i lea mataupu ma e leai se avanoa e tuuina e le Liberal mo lenei tulafono e ono ofi ai.”

Ou te talitonu foi e faapena uma isi atunuu Pasefika e aofia ai Samoa, “E lē talitonu tatou uma i lenei manatu e pei na faailoa mai ai i le Tusi Paia. E lei faapea na fetalai mai le Atua e nonofo ma Atamu ma Sitivi, na finagalo le Atua e faia Atamu i lona faatusa aemaise Eva (Adam & Eve not Adam & Steve) ia fai ma ana avā ma le polaiga ia usitai.”

E lē gata i lea sa ia ioeina le faatagaina o se tulafono e talia ai le faaaogāina o le laau faasāina o le Marijuana mo na o latou o loo moomia tele mo togafitiga mai le tiga ma le matuitui o tiga i gasegse.

Ua sauni mai nei sui tauva o le vaega faaupufai a le Leipa (labour) e agai nisi o nei mau ma saunoaga a le susuga Mazar Hadid faapea foi se avanoa e tuuina atu e le polokalama FM89.3 i le sui o le Christian Democratic Party CDP lea e taitai e Rev Fred Nile.

Sui tauva o le Liberal Mazar Hadid