E lē o malulue lava le Tautua Samoa – Palusalue Faapo II
E faaataata lafoga peitai o lea ua fesiligia e le mamalu o le atunuu e pei o le ulugalii lenei o Mailagi ma Ili Ionatana le sa‘o o nei faamatalaga ua faasalalau. Na tapa se finagalo o le Taitai o le Itu Agai, ae na faapea mai, e leai se tasi o iai se manatu faapea ma afai o lea na iai ni lafoga faapea a le afioga Lealailepule, ua manino o ni talasua ma e lei iai se moni.
O le malaga a ni sui o le Vaega faaupufai o le Tautua Samoa i Ausetalia na maua ai le avanoa e faatalatalanoa ma le mamalu o le atunuu o loo alala i nisi o ia setete i fuafuaga a le Itu Agai aemaise o taitaiga o loo unaia e lea vaega i le Palemene o Samoa. O le vaiaso na tea nei lea na toe taliu mai ai i fanua lea vaega ma ua laga ai loa mataupu nei.
Sa fesiligia le afioga Palusalue pe lē o maluelue le vaega faaupufai, fua i le lafo o nei faamatalaga pe ua iai foi se faailo ua avatu e ono see ese nisi o le Tautua Samoa a o loma ai le palota tele a le atunuuu ae na faaalia e le Taitai o le Itu Agai e leai se tulaga faapea, ona o loo mauaa lava finagalo o le vaega faaupufai i mataupu o loo latou unai.
Faaalia e Palusalue o le malaga lea na faatautaia i Ausetalia o se taumafaiga manuia ma o iina lava na manatu ua faamalosia ai le tulai mai o le Tautua Samoa aemaise o le vaaia o le lagolago a le mamalu o le atunuu i aai e pei o Brisbane ia latou taumafaiga ma le sauni atu i le faigapalota tele a le atunuu. Faaalia e Palusalue e lē maluelue gofie le tofa o tagata o le Tautua Samoa ma o le a silasila lava le atunuu i le tulai mai a le Itu Agai i le palota o loma nei.
“E malosi le talitonuga o sui o le Tautua Samoa i le mafuaaga na faavae ai le vaega faaupufai ma e lē faatauina lea talitonuga. E leai ma se isi o le Tautua e savali ese,” o le saunoaga lea a Palusalue Faapo II.
