Tetee Palemia e lē o aafia i le fulu puaa

Ua teena e le alii Palemia o le atunuu, susuga Tuilaepa Lupesoliai Sailele Malielegaoi, lipoti a nisi o nusipepa i le atunuu ua latou taua ai faapea, ua aafia le palemia i le fulu puaa poo le swine flu. O le feiloaiga a tusitala ma le alii palemia i le faaiuga o le vaiaso na tea nei na ia faasaoina ai ia tusitusiga. Peitai na faamaonia e Tuilaepa o loo ia tauaveina se pusa fualaau Tamiflu e na ona tapenapena ai, aua o le tagata mataalia e sauni i soo se taimi, aemaise ona ua matua saosaoa le pepesi o le faamai i totonu lava o Samoa.
Na taua i se tasi o lipoti o le vaiaso nei e tatau ona maua mai ai le taunuuga o se suesuega o loo faia i Niu Sila pe ua aafia le alii palemia i le swine flu. Na mafua ona faia lea suesuega ona sa aafia i auga masani o le flu, aemaise e toatele tagata mai fafo sa feiloai atu i ai i nai vaiaso e lei mamao atu. E pei foi ona silafia e lei mamao tele atu na asiasi atu i Samoa le alii palemia o Niu Sila, John Key ma lana au malaga, ma sa matua faamautinoa foi e le vaega a le soifua maloloina a le atunuu, le muai sikai uma o le vaalele o le aumalaga a o lei agai atu i fafo, ona o puipuiga lava mo lenei faamai matautia. O le taimi nei ua toa 29 gasegase o le swine flu ua faamaonia i Samoa ma o le toa 13 o gasegase na pisia mai tagata o loo alaala lava i le atunuu.
O loo aofia i le toa 13 lea le toaono o tamaiti aoga nofotumau o le Kolisi o Vaipouli. I se isi vaaiga lata mai o le pipisi o le fulu puaa i lo tatou atunuu e toatele fanau aoga o le Aoga maualalo a Sagata Maria i Savalalo ua faaalia mai e le tamaitai sa pule ua aafia i auga o le fulu masani, peitai e lei faamaonia mai suesuega i nisi o tamaitai aoga ua masalomia. Sa talimalo le aoga i se aumalaga o se aoga mai Niu Sila lea o loo masalosalo le toatele o matua o le mafuaaga lea o le aafia o fanau, peitai e le o faamaonia lea tulaga seia vagana ua aumai le taunuuga o suesuega i Niu Sila.