“Matou te lē lagolagoina le fuafuaga a le Malo”
E tasi le faamatalaina e le vaega faaupufai o le Tautua Samoa o le fuafuaga a le Malo e faatosina mai pisinisi mai fafo e ala i le ave o le tulaga tagatānuu poo le sitiseni Samoa i ia tagata, o le faatau o le tofi o le atunuu.
Ua faaalia e le Palemia susuga Tuilaepa Sailele Malielegaoi, o se fuafuaga o le a manuia ai fanau lalovaoa o le atunuu ua uma aoaoga ae ua lē maua ni galuega. Peitai ua faaalia e le taitai o le Itu Agai ma le Tautua Samoa le afioga Palusalue Faapo II, o le lē alofa o le Palemia ma le Malo i le lumanai o le atunuu o le a faia ai lea fuafuaga.
“E leai a se isi faaupuga o le pili lea, ua faatau Samoa, faafofoga i le saunoaga a le Palemia, o se maunu, ae faapefea ona faaaogā le tofi o le atunuu o se maunu”, saunoa ai Palusalue.
E lei soalaupuleina e le Palemene le pili poo le tulafono taufaaofi o le a faatino ai lea fuafuaga ae ua faailoa e le Tautua Samoa, latou te teena le fuafuaga a le Malo ona e lē tatau ona faatauina le tofi o le atunuu.
E $4miliona ua aiaia i le pili e tatau i se tagata i fafo e fia sau e faia ni ana pisinisi i le atunuu ona ia umia. O le tolu i le fā tausaga e tatau ona faagaioia ai lana pisinisi i Samoa ona ia maua lea o le sitiseni Samoa. O tagata uma e auala mai i lea pisinisi e pei o se ulugalii ma se la fanau, o le a agavaa uma i le sitiseni.
“Se‘i silasila la i lea faiga, ae faapefea pe a ave le tofi ae leai se silasila i isi vaega e agavaa uma i ai nei tagata auā o le a tutusa lelei o latou aiā tatau ma tatou tagata”. O le fingalo lea o le minisita agai o le Tautua Samoa mo le itu i le tamaoaiga ma le tupe le afioga Sooialo Dr Woods Salele.
O le finagalo o le minisita agai e tatau i le Palemia ma le malo ona matuā silasila i vaega uma e agavaa i ai ni tagata mai fafo pe a ave i ai le sitiseni ina ia lē taotaomia ai ma agavaa tau aiā tatau o tagatānuu Samoa moni.
O le finagalo na faaalia muamua e le Palemia i le lē manaomia o ni ta‘ita‘i fefefe e faia ni atinae lelei mo tagata e pei ona ia tuuaia ai le Itu Agai i le fefefe i le fuafuaga, na tali mai i ai le afioga Palusalue.
Saunoa le ta‘ita‘i o le Itu Agai i se fono ma tusitala i le Aso Lulu ua mavae, e lē fefefe le Tautua Samoa, ae e ao i le Palemia ona faia faaiuga ma fuafuaga ma le alofa, ae aua ne‘i faia i se tulaga faatautala e lamatia ai aiā tatau o tagata Samoa i le lumanai ona o le manaolasi, ae malaia ai le atunuu.
O le vaiaso nei o le a toe tauaofia ai le fono aoao faitulafono, lea o le a talanoaina ai le pili poo le tulafono taufaaofi e faasino i le tuuina atu o sitiseni Samoa i ni tagata faipisinisi mai fafo.
