O le vaiaso na tuanai sa faamanatu ai le valu tausaga talu ona faavae le polokalame leitio iloga i Sini le Samoa Sportstar i luga o le leitio FM89.3. E pei ona silafia o le masina o Fepuari i le tausaga 2008 na talia ai se talosaga e amatalia lea auaunaga mai le nofoaga autu i Liverpool.
Sa vaaia foi le lagolago mataina a le mamalu o le atunuu i se fiafia mataina na valaaulia ai paaga ma le au faaloglogo i le Cabramatta Bowling Club lea sa faafiafia ai ma le faaili iloga mai Aukilani Niu Sila le ‘Tepatasi Band’ i lea po e faamanatu ai le valu tausaga o le polokalame na faafeiloai ai e le Afioga i le faatonu ia Leilua Jerry Uesele le aofia.
O le fofoga o le po o se tasi o tootoo iloga i Aukilani Niu Sila ma luga o le alaleo a le Radio Samoa le Afioga Savea Peseta Tamaalelagi Al Harrington Lavea. Na ia valaaulia faapitoa le Afioga i le Faatamā o le leitio Leaupepe Matautu ma le faletua ia Tuala Vitoria auā le saunoaga aloaia o le po. Na o faatasi le futia ma le umele i le mau a le susuga i le Faifeau Rev Sualauvi Tuiavii na tatalo faamanuia mo le aso fanau e uiga i le valu tausaga ua ausia.
Na auai i lenei faamoemoe nisi mai Niu Sila e pei o le susuga i le faiaoga ua loa lana tautua ia Moefaauo Kolisi Sumeo aemaise le sui vaifafo o le La‘u Samoa i Sini nei ia Lupematasila Ian Saipele. E lē gata i lea sa malaga mai foi sui faasalalau leitio mai Canberra ia Alieta Sauiluma Duggan faapea Sarona Stanley. O sui mai Vitoria Melepone e aofia ai Ula Tosotagi Osasa faapea le tamaitai ia Junah Voight ma le aumalaga.
Sa vaaia foi le lagolago a le au faipisinisi le Tofa Vaifale Tai Taulaga ma le faletua ia Oketi Taulaga. E lē gata i lea o le alii pule faatonu o le ACN ia Poata Ah Voa ma le faletua ia Deborah Tavita aemaise le DJ iloga ia Fritz Helg ma lona toalua ia Eunice. O le vaevaeina o le keke sa faatinoina lea e le faletua ia Moana Tuiavii.
O le afifio atu o le aofia o se meaalofa sili lenei mo le auaunaga lenei sa ripotia ma le agaga lotonuu le tele o Taaloga a le Manu Samoa ma le Toa Samoa i Sini nei. E lē gata i lea o tama fanau a Samoa o loo tauaveina le igoa o le atunuu pele faapea foi malaga mai a afioaga, ekalesia ma le malo e autovaa mai i Sini ma Ausetalia e fia maua se fesoasoani tau faasalalauga.