O galuega lelei ua faatino e le faalapotopotoga o le Toomaga mo ē Puapuagatia, e lei gole i le saunoaga a le taitai o le Malo le afioga i le Palemia, ina ua aloaia le faamanatuina o lona 10 tausaga ua atoa.
Na saunoa le Palemia susuga Tuilaepa Lupesoliai Sailele Malielegaoi, ma ia talatala pipi le tāua o le tautua a le Toomaga ina ua amata i le tau fofoina o faiga faasatani i feusuaiga fai faamalosi ua aafia ai fanau teine a le atunuu. O ia galuega lelei e lei ‘asa ma faafitauli ma luitau ae na faaalia e le Palemia e lei solomuli ai le faalapotopotoga mai faitioga faasaga i lana galuega fesoasoani mo i latou ua afaina i ia faiga, aemaise o sauaga matagā.
O le saunoaga foi a le Palemia na ia folasia ai nisi o galuega ua faatino e le Toomaga o se faalapotopotoga tumaoti e pei o le faatuina o se aoga mo fanau ua aafia i sauaga matagā ma isi faiga faasatani.
O le aoga na fesoasoani mai se tasi o alii milionea Ausetalia mai Gold Coast Ausetalia i le faatupega atoa. O loo faia nei foi se isi galuega tele o se nofoaga mo tamaitai ma’itaga ua sauaina ma o loo fausia ile fanua ua lisi atu e le Malo ile faalapotopotoga ma o loo faatupe foi ese tamaitai agalelei mai Gold Coast lava i Ausetalia. O le nofoaga autu ua tatala o le Toomaga ua faaaoga ai se tasi o maota tuai o le matagaluega o leoleo ae ua maea ona toe faafou ise foai tupe a le Malo o Iapani, faapea nisi o tagata agalelei.
O le taimi nei ua avea le tautua a le Toomaga ua lauiloa ai le faalapotopotoga i soo se vaipanoa o le atunuu mai lava i le tumutumuga o le atunuu faasolo ane i taitai o le Malo, o ekalesia, ma isi faalapotopotoga tuma‘oti laiti aemaise o le pule mamalu a alii ma faipule o nuu ma afioaga ua atoa i ai le maopoopoga o ana galuega fai.
Ua atili lauiloa foi lana tautua i le faatuina o ni ona lala i Amerika Samoa, Niu Sila ma Ausetalia ma o loo taulamua ai foi nisi o le atunuu e faaopoopo i ai ma ekalesia eseese. O le ausia e le Toomaga o le sefulu tausaga e lei faigofie ona sa tau saili ni seleni mo ana galuega e ala i le talosaga i faalapotopotoga ma tagata aemaise o le Malo.
O le taimi nei ua tele isi tautua ua aapa i ai le Toomaga e pei o sana polokalame ua fesoasoani i nisi ua aafia i ni faafitauli i le lotoifale o aiga e pei o le loto ita, ma isi lava faafitauli ua masani ai le atunuu.
