E logo lelei saunoaga ale faafeagaiga le susuga Gasu Misikupa na taiala ai le sauniga lotu ole faamanatuina ole aso soifua le atoaga ole 84 tausaga ole tamā matua le tofa Apulu Fiti o Falesiu-uta ile Aso Toonai ua mavae.
Na saunoa le faifeau ma ia afea ai le mafuaaga ole umi ole soifua ose tagata lea na ia ta‘ua ai a lelei le tausiga ole ola e umi tausaga o soifua pea, faaopoopo iai ma vaega tāua ole mamā ole loto ma leai se mea e popole ai ae na ole fiafia. Na ioe le faifeau ile molimau ase tasi o alo tamaitai ole tofa Apulu le tina o Sina na ia faaalia i lana molimau, o lo latou tamā e fai mai lava ia ole faamagalo. “Sa‘o lelei le molimau a Sina tasi lea meaalofa ale Atua a maua ese tagata e umi tausaga o soifua, ole loto faamagalo”. Ole tina o Paese na faafetaia ele fanau ona o lana tausiga ua tele ai tausaga ole mafutaga male tamā matua.
Ose aiga na amata mai i Samoa ilo latou nuu o Falesiu e lima vaivai ma taumafai.
Peitai ina ua maua le avanoa e malaga ai i fafo nisi ole fanau e toavalu na faapena ona amata mai le olaga tauatiae i Niu Sila faasolo atu ai ina siitia i Ausetalia lea ua faamanuiaina ai i galuega ma ua lelei laoa ma maota i Samoa e faamautu ai le aiga ole tofa Apulu Fiti.
Fai mai se faamatalaga ase tasi ole aiga e alala i Niu Sila le tofa Sauvao Vaalele a manatu atu i aso ma tausaga ua mavae a‘o lei malaga ese ma Samoa mo Niu Sila, sa ausage ma matitiva le aiga. “Ua na osi fale pei se falevai sa iai ae ole toeaina (Apulu Fiti) e lē se tagata e malolo ile galue auā le tausiga ole fanau, o lea la ua matou omai e faamanatu lona aso soifua auā e na ole tasi lava le uso osi o matou tamā ua maliu, ae o ia ua matou tamā uma iai”, ole faamatalaga lea ale fetalaiga a Sauvao.
Na molimau le afafine ole toeaina le tina o Sina ma ia toe faamanatu aso olo latou laiti ile sauā o lo latou tamā, ae ina ua matutua ma ua fai a latou fanau o lea ua latou iloa ai le tāua ole sauā o lo latou tamā ina ia aua ne‘i iai se isi o latou e ola falolo ma ola paie.
Ole tasi o vaega tāua a‘o lei faia le sauniga e faamanatu ai le aso soifua o Apulu ona sa usu le nuu o Faleasiu lea na matagofie ai le aso auā ua tomua i tu ma aganuu masani a Samoa pe a taunuu se malaga. Na liliu foi le tamā matua male fanau male aiga ma teu le usu a lele ale afioaga. Ole tausaga e 1988 na masii ai Apulu Fiti ma faamautu loa male toatele ole fanau i atunuu i fafo seia oo mai ile taimi nei, peitai na faamatala lona afafine o Sina e tusa lava pe aumau i fafo ae e lē o tuua le monotaga a lo latou tamā ile nuu.
O meafai foi ale aiga male nuu e lē tuua le auai e lagolago. Ole laoa na umusa faatasi male faamanatuina o lona aso soifua sa faatupe e ona alo e toaono tamaitai ae toalua alii.
“Ose mitamitaga lava lea ia i matou ona ua mafai ona matou faia se galuega lelei mo si o matou tamā”, ole tala lea a Sina. Ose taumafataga felanulanuai na saunia mo Malo valaaulia faapea le tusitala. Sa faia foi faaaloaloga e lē gata o tupe ae o taumafa.Manuia tele lou aso soifua Apulu Fiti maua pea nisi tausaga se tele e mafuta ai male aiga male fanau.
