Tele suiga lelei i Nofoaga o Fesootaiga

Talu ona amata faatutu nofoaga tutotonu o fesootaiga televavave i itumalo eseese o Samoa, ua matua tele le suiga ua iai lea auaunaga. O le suiga fou ua iai nei ua mafai ona tapue ma lolomi ata o soo se tasi, mai ata o Tusi Folau seia oo lava i ata o faaipoipoga ma ata o aiga ma aoga e sui o Komiti Tumama ua maea ona aoaoina i lea tomai e le Matagaluega o Fesootaiga Televavave Faaonapo nei. MCIT. Taua e le tamaitai o Jacinta Teofilo, o le vaega o nafa ma le vaaiga o Fesootai Centres nei e pei ona faaigoaina ai. Ua ese le seleni ua aoina e tina o Komiti eseese mai i ata ua o latou tapue ma lomia i pepa lava o ata e pei ona masani ai i fale pueata, ae ua iai foi ma le tomai i sui o Komiti o loo iai Fesootai Centres e tuufaatasia ma tapue i CDs ia ata.
O le asiasiga o le masina o Iulai na mafai ai ona tufatufa atu ni faailoga na saunia e le Matagaluega o Fesootaiga Televavave mo Komiti na aupito tele le tupe na maua mai i ata ia na tapue o le Aso o Tina. O le Komiti a Auala i Savaii na maua le $150 tala o le tupe na o latou aoina. Sosoo ai ma Fuailolo‘u i Mulifanua e $120 le latou tupe na maua faapea Vailoa i Palauli ae tulaga fa ai le Fesootai Centre a le afioaga o Salepoua‘e i Saleimoa.
O isi auala o fesootaiga ua mafai ona aoina ai tupe aua le faatamoega o nei atina’e a Komiti a Tina, ua aofia ai Computers ma Masini Lolomi (Printers) ua totogi le faaaoga e soo se tasi. Ua iai ma le masini fai kopi (photo copiers) ia ua tele ina faaaoga e aoga a itumalo o loo iai nei nofoaga tutotonu e lolomi ai pepa o suega ma aoga a le fanau. Ua mafai foi ona faaaoga le initaneti aemaise o le masini fana ata (projector) lea ua tele ina faaali ai tifaga e Komiti i le faaiuga o le vaiaso. O tau o matamataga na taua e Teofilo, o loo fautuaina lava Komiti e faagata i le 50 sene i le ata, ona o masini nei o loo ave fua lava i ai e le polokalame o atinae nei a le Malo mo Komiti a Tina ma Tamaitai.
Talu lona faavae mai ai i le savali ai i le lima lenei o tausaga, ua toatele le mamalu o le atunuu ua le o toe tau malaga ane i Salelologa poo le taulaga foi o Apia aua manaoga tau i fesootaiga o Telefoni, o le tau sailia o nofoaga e ta ai tala o Faamasinoga, aemaise fesootaiga i le internet ma fanau o loo maua ai nei fesootaiga poo le fax foi aua o lea ua iai lava i totonu o le tele o Itumalo o Savaii ma Upolu lenei fesoasoani. Ua faaauau aoaoga mo sui o Komiti aua le maua ai o tomai e faatautaia ai nei auaunaga ma ua asia foi i masina uma nei nofoaga e inisinia ma le vaega tonu lenei o fesootaiga televavave a le Matagaluega o Fesootaiga nofoaga eseese aua le tautuaina o masini o loo faaaogaina.
Faaalia e Teofilo, o loo unaia lava le mafaufau o tamaitai i atinae o loo mafai ona maua mai i ia auaunaga aua o se auala lea ua mafai ai lava e Komiti ona totogi pili o telefoni, initaneti faapea ai le eletise i masina taitasi. O loo ua mafai ai foi ona faatau pepa mo masini lolomi atoa ai le lanu o le masini lolomi. Ua oo foi i Manono lenei auaunaga. O ata la ia ua faaopoopo i lenei tautua ma o le tufatufaga o faailoga ia na faia ia Iulai ua faapea ona maua ai ma faailoga o sui o Komiti ua mafai ona maua le tomai lenei ua faatautaia ai le isi foi lea atinae mo Komiti Tumama nei, ae o loo atiae ai foi ma tomai i le faaaogaina o masini faaonapo nei ua maua aua fanau aoga o itumalo.
Ua iai foi se tauvaga ua fuafua mo Setema aua le pueina ma le lomia o ata poo le tuufaatasia foi i CDs – O le tauvaga lenei o le a maua ai faailoga o Fesootai Centres e faamauina le maualuga o a latou tupe e aoina mai mo le Aso Faapitoa o Tama. Ua iai nofoaga faapenei ua faaalia le manaoga ua oo atu a nisi o aoga e tapue ai ata o tuufaatasiga tetele a aoga e faatautaia ma o auala na mafai e le sui o lana Komiti ua aoaoina i lenei tomai ona tapueina ata o le Aso Faapitoa mo Taumafa ma Laei Samoa a le Aoga a le Itumalo. Na lomia uma ata mai i le Fesootai Centre lea ma totogi ai loa e le aoga le Komiti mo ata na tuufaatasia ma lomia o lenei faamoemoe. Ua iai foi Komiti ua lipotia le tapa o le latou meapueata mo le pueina o faaipoipoga i le tele o itumalo ma ua faaopoopo ai lava i seleni maua a le Komiti. Ua mafai e le tele o Komiti ona totogi foi ma o latou sui ua mafai ona faamautu i Fale Komiti nei aua le faatautaia o galuega ma le aoina o seleni mai auaunaga eseese ua ofo atu e nei nofoaga.
“E tele ma anoanoai isi atinae e mafai ona faatino e tina ma tamaitai mai i Fesootai Centres nei ma o le a faaauau foi ona asia e le Matagaluega Nofoaga nei. Ae e le o taofia ai lava le valaau mai o tina pe a tulai mai faaletonu i nisi o auaunaga televavave nei,” o se faamatalaga lea a Teofilo.